"იგეგმება ახალი პროვოკაცია" - "ბირჟა მაფიის" წევრები შესაძლოა ისევ დააკავონ

სამართალი - 13:24, 11 Jul, 2017

6104

ჯგუფ „ბირჟა მაფიის წევრები“ არ გამორიცხავენ რომ ხელმეორედ დააკავონ. რეპ-ჯგუფის ერთ-ერთმა წევრმა, გიორგი ქებურიამ მოძრაობა „თეთრი ხმაურის“ ოფისში გამართულ პრესკონფერენციაზე განაცხადა, რომ „ბირჟა მაფიას წევრების მიმართ მორიგი პროვოკაცია იგეგმება“.

„მე ახლაც კი არ გავაკეთებ ზუსტ განცხადებას, რომ მინისტრმა ეს იცოდა და მისი პასუხისმგებლობის საკითხი უნდა დადგეს. უბრალოდ, მე ვთვლი, რომ მინისტრი უფრო მეტი პასუხისმგებლობით უნდა მოეკიდოს თავის გამოსვლას და დაუმთავრებელი გამოძიების პირობებში აკეთებს განცხადებას, რომ ჩვენ ვართ კრიმინალები და ეს იყო ჩვენი მხრიდან ანტისახელმწიფოებრივი ქმედება. ის რომ ბირჟა მაფიის თემაზე საუბრისას ის იწყებს კლიპზე ლაპარაკს, ეს ეჭვს ბადებს . კლიპი არ ყოფილა სისტემის კრიტიკა და რომც ყოფილიყო, მინისტრს არ აქვს უფლება თქვას, რომ არ გვაქვს აზრის გამოხატვის უფლება, ის არღვევს ჩვენს სიტყვის თავისუფლებას“, - ამბობს ქებურია.

გიორგი ქებურიას დედის, განცხადებით, გიორგი ქებურიასა და მიშკა მგალობლიშვილის მიმართ ახალი პროვოკაცია იგეგმება.

ლელა რეხვიაშვილის ინფორმაციით, უნდათ, რომ მათ კიდევ ერთხელ ჩაუდონ ნარკოტიკი.

„მაქვს დადასტურებული ინფორმაცია. მერწმუნეთ, ამის საშიშროება დგას, რადგან ისინი არიან კედელთან მიმწყვდეულები. მათ არ იციან, რა გააკეთონ თავის გადასარჩენად. იცით, რომ ციხე ყოველთვის შიგნიდან ტყდება. იქ აღმოჩნდნენ კეთილსინდისიერი ადამიანიები, რომლებიც ძალიან წუხან იმაზე რაც ხდება. იგეგმება ახალი პროვოკაცია გიორგის და მიშიკოს მიმართ, რომ მათ უნდათ, განმეორებით მოაწყონ ეს სანახაობა, კიდევ მოხდეს ჩადება, ოღონდ არა მათ მიერ, არამედ სხვა შერჩეული ჯგუფის მიერ, რომ თქვან, აი, ხედავთ, ჩვენ თუ ცუდები ვართ, ისინიც ცუდები არიან? ამის საშიშროება არის, რადგან ისინი არიან კედელთან მიმწყვდეულები“, - განაცხადა ლელა რეხვიაშვილმა.

ე.წ. რეპერების საქმეზე შინაგან საქმეთა მინისტრმა, გიორგი მღებრიშვილმა, დღეს კომენტარი არ გააკეთა. ამ თემაზე საუბარი არც მისმა მოადგილემ, შალვა ხუციშვილმა, ისურვა. მან მხოლოდ ზოგადი განმარტება გააკეთა.

„სასამართლოს განაჩენი უდანაშაულობის ცნობაზე არ ნიშნავს, რომ მოხდა ჩადება, პირდაპირ ამის ასე განმარტება არასწორი იქნება, მათ შორის სამართლებრივადაც... დეტექტიური სამმართველო ფიგურირებს ათას სხვა გახსნილ საქმეში, სადაც დადგა ასეთი განაჩენი, ხალხი პასუხისგებაში არის მიცემული, შესაბამისად, განსაკუთრებული რა არის", - განაცხადა შალვა ხუციშვილმა.