"ფოტოგრაფების საქმეზე" ეკა ბესელია იკითხება

სამართალი - 11:22, 11 Jul, 2017

1408

„ფოტოგრაფების საქმეზე“ თბილისის საქალაქო სასამართლოში დეპუტატი ეკა ბესელია იკითხება, რომელიც 2011 წელს, როდესაც ფოტოგრაფი გიორგი აბდალაძე ჯაშუშობის ბრალდებით დააკავეს მისი ადვოკატი იყო. ეკა ბესელიას თქმით გიორგი აბდალაძე პატიმრობის დროს მძიმე ფსიქოლოგიური ზეწოლის ქვეშ იყო.

„პირველივე შეხვედრისთანავე მივხვდი, რომ გიორგი იყო დათრგუნული და კომუნიკაცია უჭირდა. მეუბნებოდა - მე ამას ვერ გავუძლებ, აქედან ცოცხალი ვერ გავალო. ბოლოს წინა შეხვედრაზე, სანამ აღიარებაზე ხელს მოაწერინებდნენ, მისი მდგომარეობა კიდევ უფრო დამძიმებული იყო. ეს იყო ჩვენება, რომელიც მან გააზრებულად დაიბრალა, რადგან იქიდან ცოცხალი გამოსულიყო. იმ ღამეს, როცა აღიარებითი ჩვენება უნდა მიეცა, მასთან შესულები იყვნენ პროკურატურის, შსს-ს, კონტრდაზვერვის თანამშრომლები. რამდენიმე ადამიანი მთელი ღამის განმავლობაში გადიოდა რეპეტიციას, როგორ უნდა ეღიარებინა. მათ შორის ერთი ჩემს როლშიც კი იყო, ეს ყველაფერი მე გვიან გავიგე.“- განაცხადა ეკა ბესელიამ.,

შეგახსენებთ შინაგან საქმეთა სამინისტროს კონტრდაზვერვის დეპარტამენტმა ფოტოგრაფები ჯაშუშობის ბრალდებით 2011 წლის 7 ივლისს დააკავა. დაკავებული იყვნენ ევროპის პრესფოტოს სააგენტოს ფოტოგრაფი ზურაბ ქურციკიძე, ყოფილი პრეზიდენტის პირადი ფოტოგრაფი ირაკლი გედენიძე, მისი მეუღლე, “პრაიმ ტაიმის” ფოტორეპორტიორი ნათია გედენიძე და საგარეო საქმეთა სამინისტროს პრესამსახურის ფოტოგრაფი გია აბდალაძე.

პროკურატურამ ე.წ ფოტოგრაფების საქმე 2016 წელს გახსნა. უწყების განცხადებით ფოტოგრაფები: გიორგი აბდალაძე, ზურაბ ქურციკიძე და ირაკლი გედენიძე ჯაშუშობის გამოგონილი ბრალდებით დააკავეს და მათ ხელისუფლება 26 მაისის აქციის დაშლის აქტიური გაშუქების გამო გაუსწორდა. ე.წ. ფოტოგრაფების საქმეზე ბრალდებულია კონტრდაზვერვის ყოფილი მაღალჩინოსანი დავით დევნოზაშვილი და ასევე გლდანის მერვე სასჯელაღსრულების დაწესებულების ყოფილი ხელმძღვანელი ალექსანდრე მუხაძე. რომელიც ამჟამად წითელი ცირკულარით იძებნება.

დავით დევნოზაშვილს და ალექსანდრე მუხაძეს ბრალად ედებათ უფლებამოსილების გადამეტება.