რატომ არ მისცა "ციანიდის საქმეზე" ჩვენება ირაკლი ფირცხალავამ და რატომ შიმშილობს ყოფილი პოლიციელი

სამართალი - 12:07, 07 Jul, 2017

2787

ე.წ. კორტების საქმეზე დაკავებულმა ირაკლი ფირცხალავამ რომელიც ე.წ ციანიდის საქმის ირგვლივ უნდა დაკითხულიყო გამომძიებელს ჩვენება არ მისცა.

დაკავებულის ადვოკატი მალხაზ ველიჯანაშვილი აცხადებს, რომ ეს არ იყო დაკითხვა, ის ზეწოლასა და დაშინებას უფრო ჰგავდა.

ირაკლი ფირცხალავა მაგისტრ მოსამართლესთან მოითხოვს დაკითხვას. ფირცხალავა მოსამართლეს პროკურატურის ე.წ. ოქროს მოწმის, ირაკლი მამალაძის შესახებ მიაწვდის ინფორმაციას, თუ რა მტკიცებულებებზე დაყრდნობით აცხადებს ის, რომ ირაკლი მამალაძე არის სუს-ის აგენტი.

„მან თქვა, რომ ეს დაკითხვა არ იყო, ეს ჰგავდა ზეწოლას და დაშინებას, რომ მას სასამართლოში არ მიეცა ის ინფორმაცია, რომელიც ტელევიზიით გავრცელდა. ვინაიდან მან დააფიქსირა, რომ არ იყო თანახმა ამ ფორმატში ჩვენება მიეცა, სასამართლოზე დაიკითხება და სასამართლოზე მისცემს მოსამართლეს იმ ჩვენებას, რაც გაავრცელა, მაგრამ ეს მოხდება არა იმ პროცესზე, სადაც იხილება მამალაძის საკითხი, არამედ სხვა გამოყოფილ საქმეში. სწორედ ეს არის საეჭვო, რომ კითხავენ სულ სხვა საქმეზე, რაც არის ზეწოლის ერთ-ერთი შემადგენელი ნაწილი,“ - განაცხადა მალხაზ ველიჯანაშვილმა.

როგორც ირკვევა, თბილისის კრიმინალური პოლიციის ყოფილი უფროსი ირაკლი ფირცხალავა უკვე მეოთხე დღეა შიმშილობს. მასთან ერთად შიმშილობს კორტების საქმეზე დაკავებული კიდევ ერთი ყოფილი სამართალდამცველი გიორგი ცააძეც.

დაკავებულები მოითხოვენ კორტების საქმეზე სპეცრაზმელების ჩვენებები გაბათილდეს, რადგან მათი თქმით, ჩვენების მიცემამდე შვიდივე სპეცრაზმელი ერთ საკანში მოათავსეს, რაც კანონდარღვევაა.