ლეილა მუსტაფაევას სავარაუდოდ უთვალთვალებენ

ლეილა მუსტაფაევას სავარაუდოდ უთვალთვალებენ - ადვოკატი

სამართალი - 16:56, 06 Jul, 2017

1570

ადვოკატ არჩილ ჩოფიკაშვილის ინფორმაციით, აზერბაიჯანელი ჟურნალისტის აფგან მუხთარლის მეუღლე ლეილა მუსტაფაევას სავარაუდოდ უთვალთვალებენ. თვალთვალის სავარაუდო ფაქტი ერთი კვირის წინ დაფიქსირდა.

”29 ივნისს, დაახლოებით 18:00 საათზე, თბილისში, ერთ ერთ-კაფეში ყოფნის დროს ლეილა მუსტაფაევამ, რომელიც უკვე გასვლას აპირებდა, სავარძელზე მოულოდნელად უცხო ჩანთა შენიშნა. როდესაც გაკვირვებულმა მოიკითხა ჩანთის პატრონი და მიზეზი, მოულოდნელად შორიახლოს მდგომი საშუალო ასაკის მამაკაცი მას მივარდა, ხელიდან გამოსტაცა ჩანთა და გაიქცა შენობიდან. ლეილა მუსტაფაევა და დაშგინ აღალარლი უცნობს გამოყვნენ, რათა გაერკვიათ მისი საქციელის მიზეზი, თუმცა ამ პიროვნებას გარეთ კიდევ 2 პირი ელოდებოდა და ყველა ერთად სწრაფი ნაბიჯებით გაშორდნენ ტერიტორიას.

შემთხვევის შესახებ ლეილა მუსტაფაევამ და დაშგინ აღალარლიმ შეატყობინეს პოლიციას. ძველი თბილისის პოლიციის განყოფილებაში შედგა მათთან გასაუბრების ოქმები, სადაც დეტალურად აღწერეს მომხდარი.

ლეილა მუსტაფაევა და დაშგინ აღალარლი ფიქრობენ, რომ მათ მიმართ ადგილი შესაძლოა ჰქონდეს უკანონო თვალთვალს და მიყურადებას და ეს დაკავშირებული იყოს აფგან მუხთარლის გატაცებასთან, მათ ჟურნალისტურ და ოპოზიციურ საქმიანობასთან, რომელიც იწვევს აზერბაიჯანის ხელისუფლების გაღიზიანებას. ქმედება შესაძლოა მიზნად ისახავდეს ლეილა მუსტაფაევას დაშინებას, ჟურნალისტურ საქმიანობაში ხელის შეშლას, რაც სსკ 154-ე მუხლით გათვალისიწნებული დანაშაულია. განხორციელებული ქმედება შეიცავს სიხლის სამართლის კოდექსის 151/1-ე (ადევნება) 154-ე (ჟურნალისტისათვის პროფესიულ საქმიანობაში უკანონოდ ხელის შეშლა) , 158-ე (კერძო კომუნიკაციის საიდუმლოების დარღვევა) მუხლებით გათვალისწინებული სავარაუდო დანაშულის ნიშნებს”, - აცხადებს არჩილ ჩოფიკაშვილი.