შსს-მ რუსთაველის გამზირის მიმდებარე ბარებიდან 91 სექსმუშაკი ქალი პოლიციაში გადაიყვანა

სამართალი - 17:46, 05 Jul, 2017

25638

საქართველოს შინაგან საქმეთა სამინისტრომ პროსტიტუციისა და სხვა დანაშაულების გამოვლენის, აღკვეთისა და პრევენციის მიზნით, რუსთაველის გამზირის მიმდებარე ბარებიდან სამართალდამცველებმა 30 ივნისიდან 4 ივლისის ჩათვლით 91 სექსმუშაკი პოლიციის შენობაში გადაიყვანეს.

უწყების ცნობით, 71 მათგანი ქართველი, ხოლო 20 უცხოეთის მოქალაქე იყო.

„პროსტიტუციისა და სხვა დანაშაულების გამოვლენის, აღკვეთისა და პრევენციის მიზნით, შს სამინისტრომ განახორციელა რიგი ღონისძიებები, რომლის ფარგლებში, შსს-ს თბილისის პოლიციის დეპარტამენტის ძველი თბილისის სამმართველოს თანამშრომლებმა, 2017 წლის 30 ივნისიდან 4 ივლისის ჩათვლით ჩატარებული პრევენციული მოქმედებების შედეგად, თბილისში, რუსთაველის გამზირის მიმდებარე ტერიტორიაზე მდებარე რამდენიმე ბარიდან პოლიციის ადმინისტრაციულ შენობაში გადამოწმებისა და პიროვნების იდენტიფიცირების მიზნით მიიყვანეს: 71 ქართველი და 20 უცხოელი სექსმუშაკი ქალი (სულ - 91 პირი); ასევე, 56 მამაკაცი, მათ შორის, 15 - ქართველი და 41 უცხოეთის მოქალაქე. მიმდინარე წლის 30 ივნისს, ამავე ღონისძიების დროს, სამართალდამცველებმა ადმინისტრაციულ სამართალდარღვევათა კოდექსის 166-ე მუხლის (წვრილმანი ხულიგნობა) და 173-ე მუხლის (პოლიციელის კანონიერი განკარგულებისადმი ან მოთხოვნისადი დაუმორჩილებლობა) საფუძველზე საქართველოს 2 მოქალაქე დააკავეს, რომლებიც წარდგენილნი არიან სასამართლოში.

აღნიშნული პრევენციული ღონისძიებები მომავალშიც გაგრძელდება“ აღნიშნულია შსს- მიერ გავრცელებულ ინფორმაციაში.