ამოიღეს თუ არა სოსო თოფურიძე ინტერპოლის ძებნილთა სიიდან

ამოიღეს თუ არა სოსო თოფურიძე ინტერპოლის ძებნილთა სიიდან - მთავარი პროკურატურის კომენტარი

სამართალი - 19:48, 27 Jun, 2017

7348

კუდ-ის ყოფილი მაღალჩინოსანი სოსო თოფურიძე და პირველი სამმართველოს ყოფილი უფროსი გერონტი ალანია ინტეროპოლის ვებგვერდზე წითელი ცირკულარით ძებნილ პირებს შორის აღარ იძებნება.

სოსო თოფურიძე საქართველოში პირველი ორი ინსტანციის სასამართლოებმა დამნაშავედ ცნეს - თავისუფლების უკანონოდ აღკვეთაში, წამებაში და სამსახურებრივი უფლებამოსილების გადამეტებაში. მასზე ინტერპოლით ძებნა 2012 წელს გამოცხადდა. მასთან ერთად დამნაშავედ ცნეს კუდ-ის ყოფილი ხელმძღვანელი დათა ახალაია, პირველი სამმართველოს ყოფილი უფროსი გერონტი ალანია და ოპერატიული თანამშრომელი ოლეგ მელნიკოვი.

ბრალდების მხარის მტკიცებით, 2005 წლის 5 იანვარს ახალაიამ, მის მოადგილესთან იოსებ თოფურიძესთან, გერონტი ალანიასთან, ოლეგ მელნიკოვთან და კუდ-ის სხვა თანამშრომლებთან ერთად, შინაგან საქმეთა სამინისტროს ე.წ „მოდულის“ შენობაში, დავით ახალაიას სამუშაო ოთახში, სიტყვიერი და ფიზიკური შეურაცხყოფა მიაყენა შს სამინისტროს მოქმედ პოლიციის თანამშრომლებს იმ მოტივით, რომ თითქოს პოლიციის თანამშრომლებმა 2005 წლის 2 იანვარს რესტორან ,,ძველ სახლში“ შ.ს. მინისტრის ივანე მერაბიშვილის მეუღლეს თაკო სალაყაიას უხეშად მიმართეს.

აღნიშნულ ფაქტთან დაკავშირებით "ნიუპოსტი" საქართველოს მთავარ პროკურატურას დაუკავშირდა. როგორც უწყებაში განაცხადეს, სოსო თოფურიძე წითელი ცირკულარით ძებნილთა სიიდან ამოღებული არაა და ის რომ ამ დროისთვის მისი გვარი ვებგვერდზე არ იძებნება, განპირობებულია გარკვეული ოპერატიული მიზნებით. რაც შეეხება გერონტი ალანიას ამათან დაკავშირებით მიმდინარეობს ინფორმაციის გადამოწმება.