"დაკითხვის შემდეგ, მივიღებთ შესაბამის ზომებს"- შოთაძე მუხთარლის საქმეზე

სამართალი - 11:19, 27 Jun, 2017

1553

საქართველოს მთავარი პროკურორი ირაკლი შოთაძე კვლავ აცხადებს, რომ ქართული მხარე აფგან მუხთარლის საქმეზე აზერბაიჯანული მხარისგან დაკითხვის თაობაზე პასუხს ელოდება.

როგორც მთავარმა პროკურორმა ქართველ ჟურნალისტებს უთხრა, საქმეზე საგამოძიებო მოქმედებები გრძელდება.

"მიმდინარეობს გამოძიება. ამ ეტაპზე საკმაოდ ინტენსიური საგამოძიებო მოქმედებები არის ჩატარებული. დაკითხულია 100-ზე მეტი მოწმე, ამოღებულია გარე სათვალთვალო კამერების ჩანაწერები. აფგან მუხთარლის ადვოკატს და ოჯახის წევრებს მიეცათ შესაძლებლობა, გაცნობოდნენ საქმის მასალებს და საქმეზე დართულ ჩანაწერებს. საქართველოს პროკურატურამ სამართლებრივი დახმარების შუამდგომლობის თხოვნით მიმართა აზერბაიჯანელ კოლეგებს. ჩვენ ვითხოვთ აფგან მუხთარლის დაკითხვას და ამ დაკითხვაზე ჩვენი წარმომადგენლების დასწრებას. ასევე ვითხოვთ მისი აზერბაიჯანში არსებული სისხლის სამართლის საქმის მასალებს მას შემდეგ, რაც მოხდება აფგან მუხთარლის დაკითხვა და მოპოვებული იქნება ის მტკიცებულებები, რომლის საფუძველზე აზერბაიჯანში ხორციელდება მის მიმართ სისხლის სამართლის დევნა, მიღებული იქნება შესაბამისი ზომები,"- აღნიშნა მთავარმა პროკურორმა, თუმცა შოთაძეს დღეს არ განუმარტავს, რა ზომების მიღებას აპირებს მთავარი პროკურატურა.