გასაჩივრებიდან 7 თვის შემდეგ "პანორამა თბილისის" საქმეს სასამართლო განიხილავს

სამართალი - 12:56, 22 Jun, 2017

5080

თბილისის საქალაქო სასამართლო დღეს „პანორამა თბილისის“ საქმეზე „საიას“ სარჩელს განიხილავს, ახალგაზრდა იურისტთა ასოციაცია “პანორამა თბილისის” პროექტის ფარგლებში გაცემული მშენებლობის ნებართვების გაბათილებას ითხოვს.

საქმის განხილვა ჯერ კიდევ 7 თვის წინ უნდა დაწყებულიყო, თუმცა მესამე პირად ჩართულმა კულტურული მემკვიდრეობის დაცვის ეროვნულმა სააგენტომ სასამართლოს გადაწყვეტილება სააპელაციოში გაასაჩივრა, რის შემდეგაც პროცესი გაურკვეველი ვადით გადაიდო. დღევანდელ პროცესზე მოსარჩელე მხარე საკუთარ არგუმენტაციას წარმოადგენს.

„გასაჩივრებული გვაქვს ორი სამშენებლო ნებართვა. „პანორამა თბილისის“ ორ პროექტზე, ეს არის სოლოლაკის მაღლობი და სოლოლაკის ბაღები. რუკა, რომელიც ჩვენ კულტურის სამინისტროდან მოვიპოვეთ ადასტურებს, რომ ეს ორი მშენებლობა ნამდვილად კულტურული ლანდშაფტის დაცვის ზონაში მიმდინარეობს. თავისთავად კულტურული მემკვიდრეობის დაცვის შესახებ კანონი კრძალავს ამ ტიპის ზონაში მსგავსი სახის სამუშაოების წარმოებას. რეალურად ეს არის ის ნაწილი არგუმენტაციისა, რომელზეც ჩვენი სარჩელი არის აგებული,“ - განაცხადა "საია"-ს იურისტმა სულხან სალაძემ.