"რეზოლუციის მიღებით დადასტურდა, რომ მუხთარლის გატაცების საქმეზე გამოძიება ობიექტურად არ მიმდინარეობს"- ადვოკატი

სამართალი - 15:01, 15 Jun, 2017

1760

აფგან მუხთარლის ადვოკატი არჩილ ჩოფიკაშვილი "ნიუპოსტთან" ამბობს, რომ ევროპარლამენტის მიერ აზერბაიჯანელი ჟურნალისტის საკითხზე რეზოლუციის მიღებით დადასტურდა, რომ საქართველოში საქმეზე ობიეატური გამოძიება არ მიმდინარეობს.

"დადასტურდა რომ საქართველოში აფგან მუხთარლის საქმეზე ეფექტური და გამჭვირვალე გამოძიება არ ჩატარებულა, რეზოლუციაში სწორედ ამის საჭიროებაზეა გამახვილებული ყურადღება. საქმის ობიექტურ გამოძიებაზეა დამოკიდებული საქართველოს, როგორც ქვეყნის აღქმა დაცულია თუ არა აქ ადამიანის ძირითადი უფლებაბი. რეზოლუცია შედეგია იმისა, რაც ამ საქმესთან დაკავშირებით ხდება: დღემდე არავითარი ხელშესახები მტკიცებულება არ ყოფილა გამოვლენილი"- აღნიშნა ჩოფილაშვილმა.

ადვოკატის თქმით, საქმეში დევს არა უშუალოდ გატაცების ადგილას, არამედ ყოფილი კოლმეურნეობის მოედანზე დამონტაჟებული ქუჩის სათვალთავალო კამერით გადაღებული კადრები.

ჩოფიკაშვილი "ნიუპოსტთან" აცხადებს, რომ გამოძიებამ ქუჩის სათვალთვალო კამერებით გადაღებული კადრები დაგვიანებით ამოღო.

"საქმეზე ვიდეო ჩანაწერების ამოღება გამოძიებამ მხოლოდ ერთი კვირის შემდგომ დაიწყო. საქმეს პროკურატურის ნაცვლად, რაიონული პოლიციის განყოფილება იძიებს. აფგან მუხთარლს და მის მეუღლეს დაზარალებულის სტატუსიც კი არ აქვთ მინიჭებული. ამასთან, დაკითხულია 200 მოწმე, ოთხი ტომია საქმე და დაკითხულია ისეთი მოწმეები, ვინც არაფერი იცის ამ საქმესთან დაკავშირებით. თუ გამოძიება მომავალშიც ასე გაგრძელდა საბოლოოდ ძალიან სამწუხარო შედეგებს მივიღებთ"- განაცხადა მუხთარლის ადვოკატმა.

არჩილ ჩოფიკაშვილი დარწმუნებულია, რომ ევროპარლამენტში აფგან მუხთარლის საკითხზე რეზოლუციის პროექტის მიღებით ორი ქვეყნის ხელისუფლებაზე საერთაშორისო ზეწოლა კიდევ უფრო გაძლიერდება.

"ამ საქმეზე საერთაშორისო ზეწოლა აქამდეც იყო, არაერთი განცხადება გაკეთდა, რაც კიდევ ერთი დასტურია თუ რამხელა მნიშვნელობა აქვს საქმის ობიეტურად გამოძიებას ქვეყნისათვის. ფაქტობრივად დღემდე გამოძიება მიმდინარეობს იმისთვის, რომ რეალური გამოძიება არ ჩატარდეს"- აღნიშნა ჟურნალისტის ქართველმა ადვოკატმა.

ევროპარლამენტმა აფგან მუხთარლის საქმეზე საგანგებო, კრიტიკული რეზოლუცია მიიღო. ევროდეპუტატები აფგან მუხთარლის დაუყოვნებლივ გათავისუფლებას ითხოვენ.