"ჯიბლაძემ გატაცების ფაქტი გამოიგონა, ფინანსური ვალდებულებების შესრულება არ სურს"- ბიზნესმენის გატაცებაში ბრალდებულების ადვოკატი

სამართალი - 13:06, 14 Jun, 2017

3853

ბიზნესმენ გია ჯიბლაძის გატაცების ბრალდებით დაკავებულები წარდგენილ ბრალს არ აღიარებენ.

დაცვის მხარე აცხადებს, რომ საქმის ვერცერთი მტკიცებულება, მათ შორის ვერც აუდიო და ვერც ვიდეო მტკიცებულება ვერ ადასტურებს, რომ დაკავებულებმა სამშენებლო კომპანია სვეტის დამფუძნებელი გაიტაცეს.

დაცვის მხარის განცხადებით, "გია ჯიბლაძემ გამოიგონა გატაცების ფაქტი, რადგან ჯიბლაძეს ფინანსური ვალდებულებების შესრულება არ სურს, რომელიც კომპანია "მშენებელ სამთან" აქვს".

ადვოკატის თქმით, დაკავებულები ამ კომპანიის წარმომადგენლები არიან.

„ჩანაწერებში, არც აუდიო და არც ვიდეო ჩანაწერებში არსად არ არის არანაირი ფაქტი, რომელიც ასახავდა გატაცებას, არ არის არცერთი სიტყვა, რომელიც ასახავდა გამოძალვას. მე ვთვლი, რომ აბსოლუტურად არანაირი მტკიცებულება არ არის იმის, რაზეც მიდის საუბარი. გამოძიება თითქოს მიდის ცალმხრივად, საერთოდ არ აქვს საუბარი დაზარალებულს ვინ არის, რა ვალდებულებებიბი ჰქონდა, რა უნდოდათ. გამოძიება მიდის მხოლოდ იმ კუთხით, რომ ამ ოთხმა პირმა რაღაც დააშავა,“ - განაცხადა ადვოკატმა იოსებ ხარატიშვილმა.

დაცვის მხარე სასამართლო პროცესზე, სადაც ოთხივე დაკავებულის აღკვეთის ღონისძიებაზე უდნა იმსჯელონ, დაცვის მხარე გირაოს მოითხოვს.