"ბრალდების მტკიცებულებები ნაწილობრივ ეჭქვეშ დადგა"- "ბირჟა მაფიას" საქმის პროკურორი

სამართალი - 16:26, 12 Jun, 2017

1704

„ბირჟა მაფიას“ წევრების გირაოს სანაცვლოდ გათავისუფლების შემდეგ, ბრალდების მხარის პოზიციის ცვლილებასთან დაკავშირებით კომენტარი საქმის პროკურორმა დავით გუმბერიძემ გააკეთა. მისი თქმით, იმის გამო რომ პროკურატურამ მგალობლიშვილი-ქებურიას საქმესთან მიმართებაში სამართალდამცავების მხრიდან უფლებამოსილების გადამეტების საქმის ძიება დაიწყო, ბრალდების მტკიცებულებები ნაწილობრივ ეჭქვეშ დადგა, სწორედ ამიტომ ბრალდების მხარემ აღკვეთის ღონისძიების შეცვლას დაუჭირა მხარი:

„კონკრეტულად ამ სისხლის სამართლის საქმეში რაც ახალ გარემოებად შეიძლება ჩაითვალოს არის ის, რომ გუშინ საგამოძიებო ორგანოს მიერ დაწყებული იქნა გამოძიება ბრალდებულების განცხადების საფუძველზე. ის ინფორმაცია რაც დაფიქსირებული იქნა სასამართლოში მათი და მათი უფლებადამცველი ადვოკატების მიერ და რაც საჯაროდ გავრცელდა, ჩვენ რა თქმა უნდა გადავამოწმეთ, შედგა გასაუბრების ოქმები. მტკიცებულებები რაც ბრალდების საქმეშია, გამოდის რომ ნაწილობრივ ეჭქვეშ დადგა, იქიდან გამომდინარე რომ ჩვენ ვიძიებთ საქმეს უფლებამოსილების გადამეტებასთან დაკავშირებით, ჩვენ მივიჩნიეთ რომ მიზანშეუწონელია, მათ მიმართ აღკვეთის ღონისძიების ყველაზე მკაცრი ზომის გამოყენება.“- განაცხადა პროკურორმა, მისი თქმით ბრალდების მხარემ საჭიროდ ჩათვალა გირაოს გამოყენება და მიმალვის საფრთხის თავიდან აცილების მიზნით პირადობების ჩამორთმევა.