საბედისწერო კლიპი: " ჩვენ სამაგალითოდ უნდა დავსჯილიყავით, რომ მსგავსი ქმედება აღარ განმეორებულიყო"

სამართალი - 16:03, 12 Jun, 2017

12236

"ბირჟა მაფიას“ წევრები გიორგი ქებურია და მიშკა მაგლობლიშვილი სასამართლომ რამდენიმე წუთის წინ გაათავისუფლა.

გიორგი ქებურია 20 ათას ლარიანი გირაოს, მიშკა მგალობლიშვილი კი 50 ათას ლარიანი გირაოს სანაცვლოდ გაათავისუფლდა.

სასამართლო დარბაზის დატოვების შემდეგ, გიორგი ქებურიამ ჟურნალისტებთან მისი დაკავების დეტალებზე ისაუბრა და განაცხადა, რომ მას ნარკოტიკული ნივთიერება თვალითაც არ უნახავს და სამართალდამცავებმა ისე გააფორმეს საბუთები. მისივე თქმით, დაკავებისას, პოლიციელები კლიპზე საუბრობდნენ და ამბობდნენ, რომ მათი დასჯა "სამაგალითო" უნდა ყოფილიყო, ბრალი კი მასზე განხორციელებული ფსიქოლოგიური ზეწოლის გამო აღიარა.

„პირადად ჩემთვის არ ჩაუდიათ, თვალითაც არ მინახავს, უბრალოდ გაფორმდა საბუთებში. ბრალი ვაღიარე იმიტომ, რომ ფსიქოლოგიურ ზეწოლას ჰქონდა ადგილი. სამართალდამცავების სახელი და გვარი არ ვიცი, იმიტომ რომ არავის წარუდგენია თავი. მაგრამ ვფიქრობ, რომ შემიძლია მათი ამოცნობა. დაკავების დროს კლიპზეც იყო საუბარი, რომ ჩვენ სამაგალითოდ უნდა დავსჯილიყავით, რომ მსგავსი ქმედება აღარ განმეორებულიყო “- განაცხადა ქებურიამ. მისი თქმით, კლიპში პოლიციელის გამოსახულების დაფარვა აჭარანეტში განხორციელებული ზარის შემდეგ გადაწყდა.

ქებურია მისი და მიშკა მგალობლიშვილის დაკავებას "ბირჟა მაფიას" ვიდეოკლიპს უკავშირებს, სადაც პოლიცია გაშარჟებული იყო:

„ეს არის სიტყვის თავისუფლების შეზღუდვა და მადლობა საზოგადოებას მხარდაჭერისთვის"- განაცხადა ქებურიამ.

შეგახსენებთ, შსს-მ „ბირჟა მაფიის“ წევრები, მიშკა მგალობლიშვილი და გიორგი ქებურია ნარკოდანაშაულის ბრალდებით დააკავა.

თბილისის საქალაქო სასამართლომ მათ ორთვიანი წინასწარი პატიმრობა შეუფარდა. რეპერების დაკავებას საქართველოს სხვადასხვა ქალაქში აქციები მოჰყვა.