"ნარკოტიკი თვალითაც არ მინახავს, უბრალოდ გაფორმდა საბუთებში"- "ბირჟა მაფიას" წევრი გიორგი ქებურიას კომენტარი

სამართალი - 15:54, 12 Jun, 2017

2547

„ბირჟა მაფიას“ წევრი გიორგი ქებურია სასამართლომ 20 ათას ლარიანი გირაოს სანაცვლოდ გაათავისუფლა. ქებურიამ ჟურნალისტებთან მისი დაკავების დეტალებზე ისაუბრა და განაცხადა, რომ მას ნარკოტიკული ნივთიერება თვალითაც არ უნახავს და სამართალდამცავებმა ისე გააფორმეს საბუთები. მისი თქმით მან ბრალი ფსიქოლოგიური ზეწოლის გამო აღიარა, ქებურიას განცხადებით, ის ფიქრობს, რომ აღნიშნული პოლიციელების ამოცნობას შეძლებს:

„პირადად ჩემთვის არ ჩაუდიათ, თვალითაც არ მინახავს, უბრალოდ გაფორმდა საბუთებში , ბრალი ვაღიარე იმიტომ, რომ ფსიქოლოგიურ ზეწოლას ქონდა ადგილი. სამართალდამცავების სახელი და გვარი არ ვიცი, იმიტომ რომ არავის წარუდგენია თავი. მაგრამ ვფიქრობ, რომ შემიძლია მათი ამოცნობა. დაკავების დროს კლიპზეც იყო საუბარი, რომ ჩვენ სამაგალითოდ უნდა დავსჯილიყავით, რომ მსგავსი ქმედება აღარ განმეორებულიყო. “- განაცხადა ქებურიამ. მისი თქმით, კლიპში პოლიციელის გამოსახულების დაფარვა აჭარანეტში განხორციელებული ზარის შემდეგ გადაწყდა.

ქებურია მისი და მიშკა მგალობლიშვილის დაკავებას "ბირჟა მაფიას" ვიდეოკლიპს უკავშირებს, სადაც პოლიცია გაშარჟებული იყო:

„ეს არის სიტყვის თავისუფლების შეზღუდვა და მადლობა საზოგადოებას მხარდაჭერისთვის"- განაცხადა ქებურიამ.