"ბირჟა მაფიას" წევრების პროცესი დაინიშნა - "ობიექტური გადაწყვეტილების შემთხვევაში რეპერები გათავისუფლდებიან"

სამართალი - 11:52, 12 Jun, 2017

2047

ბრალდებული რეპერების ადვოკატები დარწმუნებულები არიან, რომ ობიეატური სასამართლოს პირობებში, გიორგი ქებურიადა მიხეილ მგალობლიშვილი წინასწარი პატიმრობიდან გათავისუფლდებიან.

როგორც "ნიუპოსტს" ერთ-ერთი დაკავებულის ადვოკატმა გაგი მოსიაშვილმა განუცხადა, დაცვის მხარეს საპელაციო სასამართლოში არგუმენტირებული სარჩელი აქვს შეტანილი.

"მე მაქვს მოლოდინი, რომ სასამართლოს საგამოძიებო კოლეგია ობიექტურ გადაწყვეტილებას მიიღებს და დაცვის მხარის საჩივარს ობიქტურად განიხილავს ამ შემთხვევაში, რა თქმა უნდა უნდა, შეიცვალოს აღმკვეთი ღონისძიება. ჩვენი საჩივარი დასაბუთებულია, საქალაქო სასამართლოს გადაწყვეტილება კი კანონთან შესაბამისობაში არ არის"- განაცხადა გაგი მოსიაშვილმა.

გიორგი ქებურიას ადვოკატის განცხადებით, ჰიპ-ჰოპ პროექტის ”ბირჟა მაფიას” წევრების საქმე, რომელიც განსაკუთრებით დიდი ოდენობით ნარკოტიკული საშუალების უკანონო შეძენისა და შენახვის ფაქტს შეეხება, გამოსაძიებლად პროკურატურას გადაეცა.

მოსიაშვილი იმედს გამოთქვამს, რომ შოთაძის უწყება მუსიკოსების საქმეს ობიექტურად გამოიძიებს.

"მე მაქვს იმედი და მოლოდინი, რომ საგამოძიებო უწყება ობიექტურ გამოძიებას ჩაატარებს და მას შემდეგ, რაც გამოძიება შემაჯამებელ გადაწყვეტილებას დადებს, შემდეგ უფრო უპრიანი იქნება კონკრეტული პირების ბრალეულობაზე საუბარი"- განმარტა ბრალდებულის ადვოკატმა.

მოსიაშვილის განცხადებით, სააპელაციო სასამართლო “ბირჟა მაფიის” წევრების საქმეზე სასამართლო უახლოეს პერიოდში იმსჯელებს.

ადვოკატის, განცხადებით, გლდანის მერვე საპყრობილეში დაკავებული მუსიკოსების მოწმის სტატუსით დაკითხვისას გიორგი ქებურიამ ყურადღება მის მიმართ განხორციელებულ ფსიქოლოგიურ ზეწოლაზე გაამახვილა.

"ჩემი დაცვის ქვეშ მყოფმა ყურადღება მის მიმართ განხორციელებულ ზეწოლაზე გაამახვილა, რომელიც სამწუხაროდ საგამოძიებო ორგანოში ხორციელდებოდა"- უთხრა "ნიუპოსტს" ბრალდებულის ინტერესების დამცველმა.

შეგახსენებთ, რომ გლდანის მერვე საპყრობილეში დაკავებული მუსიკოსების მოწმის სტატუსით გუშინ დაკითხეს. პროკურატურის წარმომადგენლები გიორგი ქებურიასა და მიხეილ მგალობლიშვილთან მას შემდეგ მივიდნენ, რაც საგამოძიებო უწყებამ იმ პოლიციელების წინააღმდეგ, ვინც ისინი დააკავა, გამოძიება დაიწყო.

გამოძიება პროკურატურის საგამოძიებო ნაწილში პოლიციელთა მხრიდან სამსახურებრივი უფლებამოსილების გადამეტებისა და მტკიცებულებების ფალსიფიკაციის შესაძლო ფაქტზე მიმდინარეობს.

პოლიციამ ნარკოტიკის შეძენა-შენახვის ბრალდებით ჯგუფ „ბირჟა მაფიის" ორი წევრი 9 ივნისს დააკავა.

საქალაქო სასამართლომ გიორგი ქებურიასა და მიხეილ მგალობლიშვილს,აღკვეთის ღონისძიების სახით პატიმრობა შეუფარდა. ბრალდებულები დანაშაულს არ აღიარებენ და ამბობენ, რომ ისინი იმ კლიპის გამო დააკავეს, რომელშიც პოლიციელია გაშარჟებული.