გლდანის მე-8 დაწესებულებაში დასრულდა ჯგუფ "ბირჟა მაფიის" წევრის, გიორგი ქებურიას გამოკითხვა.

გიორგი ქებურიას ადვოკატის, მერაბ ჩიქობავას განცხადებით, ბრალდებულმა პროკურორთან დაკავებისას მისი უფლებების დარღვევის შესახებ ისაუბრა.

ქებურია ამტკიცებს, რომ პოლიციელებმა მას თავისუფლება უკანონოდ აღუკვეთეს, დაკავების მომენტში მისი უფლებები არ გააცნეს და არ განუმარტეს, თუ რატომ აკავებდნენ.

გიორგი ქებურიას მტკიცებით, დაკავების იზოლატორში გადაყვანის შემდეგ, მას რამდენიმე საათის განმავლობაში ადვოკატთან დაკავშირების საშუალება არ მისცეს.

ჩიქობავა ასევე აცხადებს, რომ მისი დაცვის ქვეშ მყოფს პოლიციელების მიერ დაწერილ აღიარებით ჩვენებაზე ხელი ძალდატანებით ისე მოაწერინეს, რომ დოკუმენტის შინაარსიც არ გააცნეს.

ამჟამად პროკურორები "ბირჟა მაფიის" მეორე წევრის, მიხეილ მგალობლიშვილის გამოკითხვას აწარმოებენ.