"ციანიდის საქმის" განხილვა თბილისის საქალაქო სასამართლოში 23 ივნისს განახლდება

სამართალი - 16:01, 09 Jun, 2017

1687

ე.წ „ცაინიდის საქმეზე“ ბრალდებული დეკანოზ გიორგი მამალაძის სასამართლო პროცესი 23 ივნისს განახლდება, დეკანოზის ადვოკატის გიორგი ფანცულაიას თქმით, დაცვის მხარემ დღევანდელ სხდომაზე კიდევ ერთხელ დააყენა სხდომის საჯაროობის მოთხოვნა თუმცა მოსამართლემ კვლავ დახურული დატოვა:

„დღეს იყო ბრალდების მხარის შესავალი სიტყვის წარმოთქმა და დროის სიმცირის გამო ჩვენ შემდეგ სხდომაზე ვიტყვით. ჯერ ვერ გაბედეს საქმის მასალები სრულად გაუშვან. არანაირი არგუმენტი არ მოგვისმენია, რაც მოსამართლეს აფიქრებინებდა, რომ გამამტყუნებელი უნდა დადგეს. ჩვენი შესავალი განახლდება 23-ში პროცესი." - განაცხადა ადვოკატმა.

პროკურორ ზვიად გუბელაძის განცხადებით, სხდომაზე ბრალდების მხარემ დეტალურად ისაუბრა დანაშაულებრივ ქმედებაზე.

"გვაქვს მოლოდინი, რომ ომბუდსმენი იქნება ობიექტური და შეაფასებს ყველაფერს. ნეიტრალურად დაიცავს ორივე მხარის ინტერესებს. რაც შეეხება დაცვის შუამდგომლობას, საქმეში არ არსებობს ვიდეოკადრები სადაც პირადი ცხოვრებაა ასახული. ეს არის ვიდეო სადაც ირაკლი მამალაძისა და გიორგი მამალაძის საუბარია. ისინი განიხილავენ სხვა ადამიანების პირად ცხოვრებას."- განაცხადა ზვიად გუბელაძემ.

სახალხო დამცველის უჩა ნანუაშვილის განცხადებით, დეკანოზის სასამართლო სხდომაზე დასწრება მას საშუალებას მისცემს, რომ უფრო მეტი ინფორმაცია ჰქონდეს საქმესთან დაკავშირებით.

"დაიწყო პროცესი, ჩვენ ყველა სხდომას დავაკვირდებით. პროცესი სრულად არ უნდ ყოფილიყო დახურული, იგივე პოზიციაზე ვრჩებით. დანარჩენს დავაკვირდებით და გვექნება მეტი ინფორმაცია და შესაძლებლობა მოვახდინოთ შეფასებები." - განაცხადა ნანუაშვილმა.