დეკანოზ მამალაძის ადვოკატმა საპატრიარქოს იურისტს სასამართლოში უჩივლა

სამართალი - 13:06, 09 Jun, 2017

1962

ე.წ „ციანიდის საქმეზე“ დაკავებული დეკანოზის გიორგი მამალაძის ადვოკატმა, საპატრიარქოს იურისტის ედიშერ ქარჩავას წინააღმდეგ საქალაქო სასამართლოში სარჩელი შეიტანა. ადვოკატის თქმით, ქარჩავას განცხადება რომ დეკანოზს დარეგისტრირებული ჰქონდა ესპანეთში კომპანია და ამ კომპანიის მეშვეობოთ 50 მილიონი ევროს გათეთრებას აპირებდა, ცილისწამებაა და დეკანოზის ღირსების შელახვას ემსახურება. ქარჩავას დეკანოზის პატივისა და ღირსების შელახვისთვის უჩივიან.

„ედიშერ ქარჩავამ გაავრცელა ინფორმაცია, რომელიც თითქოსდა მამა გიორგის მიერ ფულის გათეთრების საქმეს ეხებოდა. ის აცხადებდა, რომ არსებობდა ამის მტკიცებულებები. ეს არის აბსურდი, მარტო იმ ფაქტის მიხედვითაც კი, რომ მისი თქმით პატრიარქი ამის საქმის კურსში არ იყო. მოვიძიეთ დოკუმენტი, სადაც პატრიარქის გაცემული მინდობილობაა იმ ქველმოქმედებაზე, რომელსაც დეკანოზი ედგა სათავაში. გრანტები და ინვესტიციები კლინიკებს უნდა მოხმარებოდა. ედიშერი აცხადებდა, რომ სარგებელს ელოდა დეკანოზი, ეს არის სიცრუე, ეს არის ღირსების შელახვა. არ შეიძლება ასეთი ცილისწამება და უარგუმენტოდ საუბარი." - განაცხადა მიხეილ რამიშვილმა.

დეკანოზ გიორგი მამალაძის ადვოკატები საპატრიარქოს იურისტისგან 50 ათას ლარს და იმ განცხადებების უარყოფას ითხოვენ, რომელიც დაკავებული დეკანოზის უკანონო სამეწარმეო საქმიანობის შესახებ გააკეთა.