"პრემიერის განცხადება აღიქმება, როგორც მითითება, რომ არც კი ჩატარდეს საგამოძიებო მოქმედებები"- მუხთარლის ადვოკატი

სამართალი - 10:50, 07 Jun, 2017

1769

აზერბაიჯანელი ჟურნალისტის აფგან მუხთარლის ოჯახის ადვოკატმა, არჩილ ჩოფიკაშვილმა საქართველოს პრემიერ-მინისტრის განცხადება შეაფასა და თქვა, რომ გიორგი კვირიკაშვილის განცხადება ოჯახის მიერ აღიქმება, როგორც მითითება სამართალდამცავი ორგანოებისთვის, რომ ამ მიმართულებით არც კი ჩატარდეს საგამოძიებო მოქმედებები.

ადვოკატის განცხადებით, აფგან მუხთარლის დაზარალებულის სტატუსიც კი არ აქვს მინიჭებული.

„საგამოძიებო ქვემდებარეობით პროკურატურა არ იძიებს ამ საქმეს. აღნიშნული მიუთითებს იმაზე, რომ ეს მითითება სრულდება და სწორად იყო აღქმული შსს-ს მხრიდან, რაც დაუშვებელია, რადგან გარემოხმარებისთვის, ელჩებთან, საერთაშორისო ორგანიზაციებისთვის განსხვავებული განცხადებები კეთდება, რომ აღნიშნულ საქმეზე გამოძიება სრულყოფილად ჩატარდება. სრულყოფილი გამოძიება ყველა ვერსიის შემოწმებას ნიშნავს, მათ შორის, მთავარი პრეტენზიის, ეჭვის შემოწმებას, რომელიც დაზარალებულ ოჯახს აქვს. როგორც მოგეხსენებათ, ბატონი აფგანი პირდაპირ აცხადებს, რომ აღნიშნული აზერბაიჯანული და ქართული მხარის თანამშრომლობის შედეგად მოხდა. ამდენად, აუცილებელია, რომ სრულყოფილი გამოძიება ჩატარდეს. ჩვენ იმედს ვიტოვებთ, რომ პროკურატურა გამოიძიებს ამ საქმეს და სრულყოფილად გაეცემა არსებულ კითხვებს პასუხი”- განაცხადა ადვოკატმა.

მისი თქმით, შოთაძის უწყებას ოჯახის მოთხოვნაზე, რომ საქმე პროკურატურამ გამოიძიოს პასუხი ამ დრომდე არ ვგაუცია.

„პროკურატურაში შევიტანეთ წერილობითი მოთხოვნა საქმის გამოძიებაზე. პასუხი არ მიგვიღია, მაგრამ გაკეთებული განცხადებების ფონზე, თუნდაც პრემიერმა რაც გააკეთა, ოპტიმისტურად ნაკლებად ვართ განწყობილი, რომ ეს გადაწყვეტილება იქნება დროულად მიღებული. თუ პროკურატურა ამ საქმეს არ გამოიძიებს, გამოვიყენებთ სამართლებრივი დაცვის ყველა შესაძლებლობას და ბოლომდე ვიბრძოლებთ იმისთვის, რომ ამ ადამიანის უფლებები იყოს ბოლომდე აღდგენილი“, - განაცხადა ადვოკატმა.

გიორგი კვირიკაშვილმა აზერბაიჯანელი ჟურნალისტის საქმის კომენტირებისას ჟურნალისტებს განუცხადა, რომ საქართველოს სახელმწიფო სტრუქტურების მონაწილეობა ამ ინციდენტში არის აბსოლუტურად გამორიცხული.