აფგან მუხთარლის საქმე - დაიწყებს თუ არა პროკურატურა გამოძიებას

სამართალი - 11:49, 06 Jun, 2017

1542

მთავარ პროკურატურაში ამ დრომდე არ გაკეთებულა განცხადება ჩაერთვება თუ არა აზერბაიჯანელი ჟურნალისტის შესაძლო გატაცების საქმის გამოძიებაში შოთაძის უწყება.

აფგან მუხთარლის ოჯახმა შესაბამისი განცხადებით, პროკურატურმ გუშინ მიმართა.

ოჯახი ითხოვს, რომ ჟურნალისტის დაკავებისა და საზღვარზე გადაყვანის საეჭვო გარემოებები პროკურატურამ გამოიძიოს, რადგან ვარუდობენ, რომ ჟურნალისტის გაუჩინარებაში პოლიციელები და სხვა საჯარო პირები იყვნენ ჩართული.

ადვოკატი არჩილ ჩოფიკაშვილი აცხადებს, რომ დანაშაულთან შესაძლოა პოლიციელებს ჰქონდეთ შეხება, ამიტომ საქმე შოთაძის უწყებამ უნდა გამოიძიოს.

"ველოდებით პროკურატურიდან პასუხს შუამდგომლობაზე, რომელიც საგამოძიებო ქვემდებარეობის განსაზღვრას შეეხება. თუმცა ისევ და ისევ პრემიერ-მინისტრის განცხადებიდან გამომდინარე უკვე დადებითი მოლოდინები აღარ გვაქვს,“-აცხადებს ადვოკატი არჩილ ჩოფიკაშვილი.

აფგან მუხთარლის მეუღლე, ლეილა მუსტაფაევა პრემიერის იმ განცხადებასაც აკრიტიკებს, სადაც გიორგი კვირიკაშვილმა მომხდარში ქართველი სამართალდამცველების მონაწილეობას გამორიცხა. დღესვე ცნობილი უნდა გახდეს დაენიშნება თუ არა სახელმწიფო დაცვა აფგან მუხთარლის მეუღლის მსგავსად საქმის ორ მთავარ მოწმეს.

„ჩნდება კითხვა, საიდან აქვს პრემიერ-მინისტრს ინფორმაცია. აფგან მუხთარლის საქმეზე გამოძიება მიმდინარეობს და ვფიქრობ მის დასრულებამდე მსგავსი განცხადებების გაკეთება შეცდომაა. პატივი უნდა სცეს კანონის უზენაესობას და გამოძიების შედეგებს დაელოდოს, ისევე როგორც მე ველოდები. ამ დრომდე არც მე და არც ჩემმა ადვოკატმა არ ვიცით, თუ რა სტადიაზეა გამოძიება. ჩვენ აფგან მუხთარლის საქმის გამოძიების მოთხოვნით პროკურატურას მივმართეთ და ამ დრომდე მათ პასუხს ველოდებით,“-განაცხადა ლეილა მუსტაფაევამ.