"პროკურატურას უნდობლობას ვუცხადებთ, ობიექტურ გამოძიებას და ექსჰუმაციას ვითხოვთ"- ხანძრის შედეგად გარდაცვლილი ბავშვების მშობლები

სამართალი - 12:17, 30 May, 2017

4515

2 წლის წინ ქობულეთში, სასტუმროში გაჩენილი ხანძრის შედეგად გარდაცვლილი ბავშვების მშობლები პროკურატურასთან შიმშილობის დაწყებას გეგმავენ.

როგორც დღეს გამართულ პრესკონფერენციაზე ტრაგიკულად გარდაცვლილთა მშობლებმა განაცხადეს, ისინი მომხდარის ხელახალ გამოძიებას, მათ შორის, ცხედრების ექსჰუმაციას ითხოვენ.

ამასთან მათი თქმით, არ სჯერათ ვერსიის, რომლის მიხედვითაც სასტუმროს ერთ-ერთმა მფლობელმა ზაზა ართმელიძემ თავი საკუთრი გადაწყვეტილებით მოიკლა.

„არადამაჯერებელია ჩვენთვის ამ ადამიანის თვითმკვლელობა. ადამიანმა თითქმის მილიონ-ნახევრიანი ქონება დაკარგა, 3 არასრულწლოვან ბავშვთან ერთად, ამაზე მეტი უბედურება რა უნდა დაატყდეს ადამიანს?! რატომ მაშინ არ მოიკლა თავი? იძლებული გახადეს და თვითმკვლელობამდე მიიყვანეს“, - აცხადებენ მშობლები.

რაც შეეხება უშუალოდ მოზარდების გარდაცვალების საქმის გამოძიებას, მშობლები ირწმუნებიან, რომ სამართალდამცველები ხელს აფარებენ პედაგოგებს, ვინც ბავშვების მიმართ უყურადღებობა გამოიჩინეს.

„უნდობლობას ვუცხადებთ აჭარის პროკურატურას და სასამართლოს. მთავარ პროკურორ ირაკლი შოთაძეს ვთხოვთ, სამი დღის განმავლობაში მიგვიღოს და ექსჰუმაციიდან დაწყებული, თავიდან გამოიძიონ ეს საქმე. წინააღმდეგ შემთხვევაში, ოჯახთან ერთად პროკურატურასთან შიმშილობას დავიწყებ“, - განაცხადა ხანძრის შედეგად დაღუპული თორნიკე ხვიჩიას მამამ ელგუჯა ხვიჩიამ.

ქობულეთში მდებარე სასტუმრო „არმაზის“ ერთ-ერთი მფლობელი ზაზა ართმელიძე გარდაცვლილი გუშინ იპოვეს.

გამოძიება „სისხლის სამართლის კოდექსის“ 115-ე მუხლით დაიწყო, რაც თვითმკლელობამდე მიყვანას გულისხმობს.

შეგახსენებ, რომ 2015 წელს 10 მაისს, ქობულეთში, აღმაშენებლის ქუჩაზე მდებარე, ზაზა ა-ს კუთვნილ, ე.წ. „ხასანას“ სასტუმროში ხანძარი გაჩნდა.

ამ დროს სასტუმროში იმყოფებოდნენ რუსთავის ქორეოგრაფიული ანსამბლ „სიხარული-2-ის“ წევრები, მათ შორის, არასრულწლოვნები, რომელთაგანაც სამი ადგილზე დაიღუპა.

ქობულეთის რაიონული პოლიციის თანამშრომლებმა და მაშველებმა ალმოდებული შენობიდან 45 ადამიანი, მათ შორის, 30 მოზარდი, გამოიყვანეს.

გამოძიების ინფორმაციით, საგამოძიებო მოქმედებების ფარგლებში დაინიშნა სხვადასხვა სახის კომპლექსური ექსპერტიზა. საინჟინრო ექსპერტიზის შედეგად დადგინდა, რომ აღნიშნულ სასტუმროში დარღვეული იყო სამშენებლო ნორმები და წესები, ხოლო სახანძრო-ტექნიკური ექსპერტიზის შედეგად დადგინდა, რომ ხანძრის გაჩენა დაკავშირებული იყო ელექტროტექნიკურ გაუმართაობასთან. აღსანიშნავია, რომ ცეცხლის კერა მდებარეობდა იმ ოთახში, სადაც გარდაცვლილი მოზარდები იმყოფებდნენ.