"პარლამენტის წევრ გელა მიქაძის წინააღმდეგ სასამართლო დავა საქართველოშიც მიმდინარეობს"

სამართალი - 21:08, 23 May, 2017

2346

კომპანია „რაკია ჯორჯიას“ იურისტი ნათია წკეპლაძე აცხადებს, რომ საქართველოს პარლამენტის წევრ გელა მიქაძის წინააღმდეგ სასამართლო დავა საქართველოშიც მიმდინარეობს.

“დღეს დილით მივიღეთ არაბეთის გაერთიანებული საამიროებიდან სასამართლოს განაჩენი, რომლის მიხედვითაც, 15-წლიანი პატიმრობა მიესაჯა სამივე ბრალდებულს. ასევე, მათ დაეკისრათ ზიანის ანაზღაურება თანხების უკანონო მითვისებისთვის. ეს ეხება ათეულობით მილიონ ამერიკულ დოლარს. ჩემი იურიდიული კომპანია აწარმოებს სამოქალაქო დავებს საქართველოს საერთო სასამართლოებში ბატონი მიქაძის წინააღმდეგ. გამომდინარე იქიდან, რომ მილიონობით თანხა და ქონებაა მითვისებული, ვიმედოვნებთ, რომ საერთო სასამართლოები ობიექტურ, მიუკერძოებელ და კანონიერ გადაწყვეტილებას მიიღებენ ამ საკითხზე. რაც შეეხება კომპანია Raystar Trade-თან დაკავშირებულ გადაწყვეტილებას, თავად კომპანია „რაკია ჯორჯია“ გაავრცელებს ოფიციალურ პრესრელიზს, სადაც მეტი დეტალი გახდება ცნობილი“,-აღნიშნა ნათია წკეპლაძემ "საზოგადოებრივთან" საუბრისას.

საქართველოს პარლამენტის წევრი „პატრიოტთა ალიანსიდან“ გელა მიქაძე ერთ-ერთია, ვისაც გაერთიანებული საემიროების სასამართლომ 17 მილიონის მითვისებისთვის 15 წლიანი პატიმრობა მიუსაჯა.

სასამართლოს გადაწყვეტილებით პირებმა, რომელბიც საქმეში ფიგურირებენ დაზარალებულ კომპანიას მითვისებული თანხები უნდა დაუბრუნონ. აღნიშნულის შესახებ ინფორმაციას რუსთავი 2 ავრცელებს.

ჰატერ მასადს 12 მილიონ 800 ათასის, ჯანაშიას 4 მილიონ 400 ათასი დოლარის დაბრუნება დაეკისრა. საქმე ეხება ფოთის პორტსა და კომპანია რაკიას შორის შეთანხმების გაფორმებას, შემდეგ მის ანულირებას. შედეგად კომპანია სერიოზულად დაზარალდა.