საქართველოს ყოფილი მთავარი პროკურორის ოთარ ფარცხალაძის ადვოკატი, დღეს შს სამინისტროს მიერ გასაჯაროვებულ ვიდეოკადრებთან დაკავშირებით კომენტარს აკეთებს. მისი თქმით, ლაშა თორდიას პოზიცია, რომ შსს-მ კადრები დასკვნის გადასაფარად გააასაჯაროვა, გასაგებია, თუმცა თუ დასკვნაში რაიმე დანაშაული იკვეთება, ამას ვერავინ და ვერაფერი გადაფარავს:

„კადრებში, რომელიც გავრცელდა, ჩანს ის რეალობა, რომ ფარცხალაძის მხრიდან არანაირ აქტიურ მოქმედებას ადგილი არ აქვს, კარგად ჩანს თავდასხმის ინიციატორი ვინც არის, აშკარად ჩანს პირადი დაცვის მხრიდან განხორციელებული აქტიური მოქმედება. კადრებში ნათელია, რომ ოთარ ფარცხალაძე ე.წ. ინციდენდის მერე 15 წამში ტოვებს „ელ ცენტროს“ არა სირბილით, არამედ ჩვეულებრივი ნაბიჯებით. ეს ყოველივე მიუთითებს, რომ ლაშა თორდიას მიერ გაკეთებული განცხადებები არ არის სრულყოფილი და არ არის რეალური იმისა, რაც მოხდა „ელ ცენტროში“. შესაბამისად, ის ინფორმაცია, რაც მივაწოდოეთ ჩვენს მიერ გამოკითხული მოწმეების მხრიდან, დადასტურდა კადრებითაც. დადასტურებული ფაქტია, რომ ფარცხალაძის მიერ აქტიურ მოქმედებას ადგილი არ აქვს ამ ე.წ ინციდენტში",- აღნიშნა გაგი მოსიაშვილმა.