ღამის კლუბ „ელ ცენტროს“ დირექტორი ილია კაპანაძე ყოფილ მთავარ პროკურორ ოთარ ფარცხალაძესა და გენერალურ აუდიტორ ლაშა თორდიას შორის 13 მაისს მომხდარ ინციდენტზე პირველ კომენტარს აკეთებს. როგორც ილია კაპანაძემ საზოგადოებრივს განუცხადა, მომხდარის შესახებ, გამოძიებამ „ელ ცენტროს“ თანამშრომლები სრული შემადგენლობით დაკითხა.

მისი თქმით, ინციდენტის ღამეს თავადაც იმყოფებოდა კლუბში, თუმცა „იმდენად ხანმოკლე შემთხვევა იყო“, რომ მომხდარის შესახებ, მედიით შეიტყო.

„გავიგე, რომ პატარა შეკამათება იყო. ვინ იჩხუბა და რა გააკეთეს, მე არ გამიგია. ეს ინციდენტი მასშტაბური არ იყო და ვერც იქნებოდა, რადგან დაცვა გვყავს და როდესაც რამე ხდება, მომენტალურად ახდენს რეაგირებას. მე როგორც ვიცი, ინციდენტი რამდენიმე წამის განმავლობაში ხდებოდა და შემდეგ განეიტრალდა სიტუაცია“, - განაცხადა ილია კაპანაძემ.

ის არც უარყოფს და არც ადასტურებს ინფორმაციას, დაწესებულებიდან სათვალთვალო კამერების ჩანაწერების ამოღების შესახებ.

„დაიკითხა მთელი სამუშაო პერსონალი, გარკვეული ღონისძიება ჩატარდა, რაზეც ვერ ვისაუბრებ, იმიტომ, რომ გამოძიება ჯერ არ დასრულებულა და უმჯობესია, დაელოდოთ გამოძიების შედეგებს. გამოძიება დამიკავშირდა, მთხოვეს და ინციდენტის მომდევნო დღეებში ჩატარდა საგამოძიებო ღონისძიება“, - განაცხადა ილია კაპანაძემ.

შეკითხვაზე, რამდენ ხანში იშლება დაწესებულებაში სათვალთვალო კამერების ჩანაწერები, კაპანაძემ აღნიშნა, რომ ამის შესახებ ინფორმაციას არ ფლობს.

„რაც შეეხება კამერებს, მიმართეთ გამოძიებას. ყველანაირი ჩვენება, საბუთი და ინფორმაცია აქვს გამოძიებას. დანარჩენ ინფორმაციას მიიღებთ გამოძიებისგან“, - განაცხადა ილია კაპანაძემ.

ლაშა თორდიას ინფორმაციით, 13 მაისს, შარდენის ქუჩაზე მას თავს დაესხნენ, რაშიც ყოფილი მთავარი პროკურორი ოთარ ფარცხალაძე მონაწილეობდა. მომხდარზე გამოძიება სისხლის სამართლის კოდექსის 126-ე მუხლით მიმდინარეობს, რაც ცემას გულისხმობს. სამართალდამცველებმა უკვე დაკითხეს ლაშა თორდიაც და ოთარ ფარცხალაძეც.

წყარო: "საზოგადოებრივი მაუწყებელი".