"თორდია თვითმხილველებზე ზეწოლას ახორციელებს, ის ემუქრება ადვოკატებსა და თავად ოთარ ფარცხალაძესაც

"თორდია თვითმხილველებზე ზეწოლას ახორციელებს, ის ემუქრება ადვოკატებსა და თავად ოთარ ფარცხალაძესაც - ადვოკატი

სამართალი - 10:56, 19 May, 2017

1933

ყოფილი მთავარი პროკურორის ოთარ ფარცხალაძის ადვოკატი მერაბ ჩიქოვანი „ელ ცენტროში“ მომხდარი ინციდენტის თვითმხილველებს მოუწოდებს, "არ შეეშინდეთ ლაშა თორდიას მუქარის და სიმართლე თქვან".

ჩიქოვანის თქმით, ლაშა თორდია თვითმხილველებზე ზეწოლას ახორციელებს, გარდა ამისა, მთავარი აუდიტორი ემუქრება ადვოკატებსა და თავად ოთარ ფარცხალაძესაც.

"ჩვენ ღიად და საჯაროდ მოვუწოდებთ მომხდარი შემთხვევის ნებისმიერ თვითმხილველ პირს, არ შეგეშინდეთ საქართველოს მთავარი აუდიტორის მუქარის, ნუ მოგერიდებათ, თქვათ სიმართლე, - განაცხადა ფარცხალაძის ადვოკატმა.

„ჩვენი ასეთი სახის ღია მოწოდება ნებისმიერი თვითმხილველი პირის მიმართ განპირობებულია იმით, რომ ინფორმაციის შეგროვების დროს უკვე არაერთმა ნეიტრალურმა პირმა, რომელიც სტუმრობდა მოცემულ კაფე-ბარს და იყო თვითმხილველი მომხდარისა, უარი განაცხადა გამოკითხვაზე. მათი მხრიდან აპელირება გაკეთდა ლაშა თორდიას სატელევიზიო განცხადებაზე, სადაც ეს უკანასკნელი ცინიზმით მოიხსენიებს საკუთარ მოქალაქეებს და აცხადებს, რომ მათ აუცილებლად მოსთხოვს პასუხს. ასეთი ტიპის მუქარამ თავისი ნაყოფი გამოიღო და დღეს უკვე არაერთი ნეიტრალური ადამიანი უარს აცხადებს ინფორმაციის გაცემაზე. ბატონი თორდიას მუქარები ამით არ დასრულებულა და ის უკვე საჯაროდ გადასულია ადვოკატისა და ბატონ ოთარ ფარცხალაძის ირიბ მუქარაზე. შევახსენებთ თორდიას, რომ როგორც პროვოკაცია, ცრუ დასმენა, მუქარა და ადვოკატის საქმიანობისთვის ხელის შეშლა დასჯადია კანონმდებლობით და ასეთი ფაქტის არსებობის შემთხვევაში, მისგან განსხვავებით, დროულად შევატყობინებთ სამართალდამცავ ორგანოებს“, - განაცხადა მერაბ ჩიქოვანმა.