დასტურდება, რომ აგრესიის ინიციატორი არა ოთარ ფარცხალაძე, არამედ ლაშა თორდია იყო

დასტურდება, რომ აგრესიის ინიციატორი არა ოთარ ფარცხალაძე, არამედ ლაშა თორდია იყო - ყოფილი მთავარი პროკურორის ადვოკატები

სამართალი - 12:11, 16 May, 2017

17873

ყოფილი მთავარი პროკურორის ოთარ ფირცხალაძის ადვოკატების განცხადებით, ფარცხალაძის მიმართ აგრესია თავად ლაშა თორდიამ გამოიჩინა.
როგორც სპეციალურ ბრიფინგზე ფარცხალაძის ადვოკატებმა აღნიშნეს, გენერალური აუდიტორის მიერ გაკეთებული განცხადებები სიმართლეს არ შეესაბამება და ამას მტკიცებულებების სახით შემთხვევის ადგილზე მყოფი პირების გამოკითხვის ოქმებიც ადასტურებს.

"ერთ-ერთი თვითმხილველი პირის ჩვენების ციტირებით, ჩვენ მიერ დასმულ კითხვაზე, თუ რა მოხდა რეალურად 2017 წლის 12-13 მაისს კაფე-ბარ ელ ცენტროში, რა ინციდენტის მომსწრე გახდა, გამოკითხული პირი განმარტავს, რომ ის, რაც მან ნახა საკუთარი თვალით, მას ინციდენტსაც ვერ უწოდებს, რადგან ყველაფერი დაიწყო და გრძელდებოდა რამდენიმე წამის განმავლობაში ისე, რომ აღნიშნულ ინციდენტში ბატონ ოთარ ფარცხალაძეს მონაწილეობა არც კი მიუღია,“ - განაცხადა ადვოკატმა, მერაბ ჩიქოვანმა.

ადვოკატებმა ასევე აღნიშნეს, რომ გენერალური აუდიტორი ურთიერთგამომრიცხავ განცხადებებს აკეთებს, რაც დასტურდება იმით, რომ მასზე თავდასხმას არა ათი პირი ახდენდა, არამედ მასზე თავდასხმას ადგილი არ ჰქონია.

უფლებადამცველებმა ოქმები დღეს ჟურნალისტებს წარუდგინეს.

ადვოკატების განცხადებით, ადგილზე მყოფი პირები, მათ შორის კაფე ”ელ ცენტროს” თანამშრომლები, ადასტურებენ, რომ არავითარ მასშტაბურ ინციდენტს ადგილი არ ჰქონია.

მათივე თქმით, ლაშა თორდიას მხიდან წამოსული აგრესია ფირცხალაძის პირადი დაცვის მიერ განეიტრალდა, რომელიც ადეკვატურად და პროპორციულად იყო გამოყენებული.
ფარცხალაძის ადვოკატები ინტერესდებიან, რატომ არ გამოიძახა გენერალურმა აუდიტორმა სამართალდამცველები და რატომ დარჩა კაფე „ელ ცენტროში“.

მათი თქმით, აღნიშნული ფაქტი ეჭვს იწვევს, რომ თორდიას პოლიტიკური მოტივები ამოძრავებდა.

”შესაბამისად ამ მტკიცებულებნებით სახეზე გვაქვს რომ ოთარ ფარცხალაძე არის ლაშა თორდიას მიერ პროვოცირების მცდელობის მსხვერპლი”, - განაცხადა ფარცალაძის ადვოკატმა მერაბ ჩიქოვანმა.

თორდიას ფიზიკურად 13 მაისს გაუსწორდნენ. შემთხვევა თბილისში, შარდენის ქუჩაზე მდებარე ერთ-ერთ ღამის კლუბში მოხდა.

თორდიას მტკიცებით, მას ყოფილი მთავარი პროკურორი, ოთარ ფარცხალაძე დაესხა თავს.