"პირადი ცხოვრების ამსახველი მიმოწერაა, წერილში გარდაცვლილზე საუბარი საერთოდ არ ყოფილა”

"პირადი ცხოვრების ამსახველი მიმოწერაა, წერილში გარდაცვლილზე საუბარი საერთოდ არ ყოფილა” - ადვოკატი ბაბუას მკვლელობის საქმეზე

სამართალი - 19:04, 13 May, 2017

13741

77 წლი მოხუცის მკვლელობის საქმეში ერთ-ერთი ბრალდებულების ადვოკატი ბონდო ბათიაშვილი აცხადებს, რომ საქმეში არსებულ მტკიცებულებათა ერთობლიობასთან თანხვედრაში არ არის.

მისი თქმით, "პროკურატურა აცხადებს, რომ ბრალდებულებს სახლში 200 000 დოლარი ეგულებოდათ, ამ დროს კი ედავებიან, უნივერსიტეტის სწავლის საფასურის 335 ლარის წაღებას".

ადვოკატის განცხადებით, ბრალდებულები ადვოკატის გარეშე დაიკითხნენ.

”ბრალდებულები ადვოკატის გარეშე დაიკითხნენ და აღიარეს დანაშაული, მაგრამ საქმეში არსებულ სხვა მტკიცებულებათა ერთობლიობაში, მათი ჩვენება ვერ მოდის თანხვედრაში. ჩვენებაში ბრალდებულები აცხადებენ, რომ იყვნენ პაპასთან ასულები, სულ სხვა სიტუაციასა და გარემოებაში, აღნიშნავენ, რომ მათ მკვლელობა არ ჰქონდათ დაგეგმილი. მათი იქ ყოფნის პერიოდში მოხდა თუ არა მკვლელობა, ეგ გამოძიებით არ არის დადგენილი"- განაცხადა გიორგი გვარამიას ადვოკატმა.

მისივე თქმით, მტკიცებულებებით არ მკვლელობის წინასწარ განზრახვაც არ სჩანს.

"პროკურატურამ წარმოადგინა წერილობით სახით მტკიცებულება, რომ თითქოსდა წინასწარ ჰქონდათ განზრახული მკვლელობა. აღნიშნული მტკიცებულებით საერთოდ არ ირკვევა, რომ ვიღაცის მოკვლა სურდათ და მკვლელობა იგეგმებოდა. წერილის შინაარსთან დაკავშირებით ვერ გესაუბრებით, ეს არის პირადი ცხოვრების ამსახველი მიმოწერა, თუმცა ამ წერილში გარდაცვლილზე საუბარი საერთოდ არ ყოფილა”, - განაცხადა ბონდო ბათიაშვილმა.

გამოძიების ინფორმაციით, 77 წლის მამაკაცს შვილიშვილმა და მისმა მეგობარმა ბიჭმა სასიკვდილო ჭრილობები ცივი იარაღით მიაყენეს, ბინაში კი, კვალის დაფარვის მიზნით, ხანძარი გააჩინეს.

გამოძიება დამამძიმებელ გარემოებაში ჩადენილი განზრახ მკვლელობის ფაქტზე საქართველოს სისხლის სამართლის კოლექსის 109-ე მუხლით მიმდინარეობს. მკვლელობის მოტივად ანგარება სახელდება.