წერილი საქმეში და 200 000 დოლარის გამო მოკლული მოხუცი - პროკურორი ბაბუას მკვლელობის საქმის დეტალებზე

სამართალი - 17:44, 13 May, 2017

34905

ბუდაპეშტის ქუჩაზე მომხდარი მკვლელობის საქმის პროკურორი ინა გუგუშვილი აცხადებს, რომ ბრალდებულებმა მოხუცი ანგარების მიზნით მოკლეს, რადგან 200 ათასი დოლარი ეგულებოდათ, რომელიც ერთ-ერთი მათგანის სწავლის გადასახდელად სურდათ, თუმცა სახლიდან მხოლოდ 335 ლარია წაღებული.
”ბრალდებულებს ბრალად ედებათ ანგარებით განზრახ მკვლელობა, მოტივი გახლავთ ფულადი თანხის 200 000 დოლარის წაღება. არსებობს მოწმეთა ჩვენებები და მტკიცებულებები, რომელიც სრულად იძლევა საშუალებას ბრალის წარდგენის - განაცხადა ინა გუგუშვილმა.პროკურორი ბრალდებულთა მიმართ ზეწოლას გამორიცხავს. მისი თქმით, დაკავებულების დაკითხვის დროს შეთავაზებული იყო ადვოკატი, თუმცა ბრალდებულებს უფლებადამცველის დასწრების სურვილი არ გამოუთქვამთ.

ბრალდების მხარის ერთ-ერთ მტკიცებულებას კი წერილი წარმოადგენს, რომელიც პროკურორის თქმით, ბრალდებულის მიერ არის დაწერილი. პროკურორმა წერილის შინაარსი დღეს არ გაასაჯაროვა.

ბრალდებულები ამ ეტაპზე დუმილის უფლებას იყენებენ.

გამოძიების ინფორმაციით, 77 წლის მამაკაცს შვილიშვილმა და მისმა მეგობარმა ბიჭმა სასიკვდილო ჭრილობები ცივი იარაღით მიაყენეს, ბინაში კი, კვალის დაფარვის მიზნით, ხანძარი გააჩინეს.

გამოძიება დამამძიმებელ გარემოებაში ჩადენილი განზრახ მკვლელობის ფაქტზე საქართველოს სისხლის სამართლის კოლექსის 109-ე მუხლით მიმდინარეობს. მკვლელობის მოტივად ანგარება სახელდება.