მუქარა ოჯახის წევრებზე - რის აღიარებას მოითხოვდნენ ფოტოგრაფ ირაკლი გედენიძისგან

სამართალი - 16:00, 28 Apr, 2017

2128

თბილისის საქალაქო სასამართლოში ე.წ „ფოტოგრაფების საქმის“ განხილვა მიმდინარობს. დღეს სასამართლო სხდომაზე დაზარალებულის სტატუსით ფოტოგრაფი ირაკლი გედენიძე დაკითხეს. ირაკლი გედენიძის თქმით, მას აქვს შთაბეჭდილება, რომ მისი და მისი მეუღლის დაკავება 2011 წელს, 26 მაისის აქციაზე გადაღებულ ფოტოებს უკავშირდება.

გედენიძის განცხადებით, კონტრდაზვერვის დეპარტამენტის ყოფილი მაღალჩინოსანი დავით დევნოზაშვილი შვილების სიცოცხლით და ოჯახის პირადი ცხოვრების ამსახველი ფოტოების გამოქვეყნებით ემუქრებოდა და აიძულებდა ეღიარებინა გამოგონილი ჯაშუშობის ბრალდება.

"აღკვეთის ღონისძიებად, პატიმრობის შეფარდების შემდეგ, წაგვიყვანეს გლდანის ციხეში, ე.წ. ფუქსებში. მოპირდაპირე კამერაში იყვნენ ზურა და გია. მერე შემოვიდა თანამშრომელი, შეგვამოწმეს და საკანში შეგვასახლეს. იქ დამხვდა ახალგაზრდა ბიჭი, რომელსაც ბადგარმა უთხრა, ახალი თანამოსაკნე გყავს და გაარკვიეო. ამ ბიჭმა ფანჯრის გისოსზე მაჩვენა დაშლილი სამართებლები. ვკითხე, რაში მჭირდებოდა, მითხრა, იცოდე მაინცო. 2-3 დღის შემდეგ, ბადრაგმა გამიყვანა ადმინისტრაციულში. იქ დამხვდა პიროვნება და მკითხა ტუჩებზე სისხლი რატომ გაქვსო, დევნოზაშვილმა უთხრა, სიმწრით იკვნიტავსო. კითხვები დამისვეს, ვისთან გქონდა ურთიერთობა ულვაშებიანთანო. ამ კითხვის შემდეგ, დევნოზაშვილი მითხრა დამეწერა, რომ 2008 წლის ომში გადაღებულ ფოტოებს და ჯარის გადაადგილების გეგმებს ვითომ ქურციკიძეს ვაძლევდი. ამაზე უარი განვაცხადე, ძალიან ცუდად გავხდი და გადამიყვანეს საკანში. ეს ხდება მას შემდეგ, რაც აღიარებითი უკვე მიცემული მაქვს. საკანშიც ძალიან ცუდად ვიყავი და გადამიყვანეს საავადმყოფოში“- განაცხადა გედენიძემ.

გედენიძემ აღნიშნა, რომ ბრალდებული დავით დევნოზაშვილი 2011 წელს, გათავისუფლების შემდეგ, ხშირად ეკონტაქტებოდა და აკონტროლებდა. "რეზონანსის“ ჟურნალისტმა ელისო ჩაფიძემ ჩემთან ჩაწერა ინტერვიუ. მორიგი დაკავშირებისას, დავით დევნოზაშვილმა მითხრა, ხომ არ გაგიჟდი, ეგ ინტერვიუ არ უნდა გავიდესო. შემდეგ დავუკავშირდი ჟურნალისტს და ვთხოვე, არ გამოექვეყნებინა", - განაცხადა ირაკლი გედენიძემ.