ელისო კილაძის შვილის გაყვანა საკნიდან - თბილისის საქალაქო სასამართლო განცხადებას ავრცელებს

სამართალი - 20:19, 20 Apr, 2017

16537

თბილისის საქალაქო სასმართლო ჟურნალისტ ელისო კილაძის შვილის, დავით ხარშილაძის ადვოკატებს პასუხობს.

როგორც "ნიუპოსტს" სასამართლოს პრესსამსახურიდან აცნობეს, დღეს თბილისის საქალაქო სასამართლოს ადმინისტრაციულ საქმეთა კოლეგიამ დაიწყო ადმინისტრაციული სამართალდარღვევის ოქმის განხილვა, ექიმის დანიშნულების გარეშე, ნარკოტიკული საშუალების სავარაუდო მოხმარების ფაქტზე, დავით ხ.-ს მიმართ.

"სამართალდარღვევის ოქმის თანახმად, შსს საექსპერტო-კრიმინალისტიკური მთავარი სამმართველოს ნარკოლოგიური შემოწმების სამსახურის 2017 წლის 14 მარტის დასკვნის საფუძველზე, ლაბორატორიული გამოკვლევის შედეგად დავით ხ.-ს ნარკოტიკული საშუალება - „ბუპრენორფინის“ მოხმარების ფაქტი დაუდგინდა.

წესისამებრ, ადმინისტრაციულ პასუხისგებაში მიცემული პირი, მოწვეულ იქნა პენიტენციური დაწესებულებიდან. ღია სასამართლო სხდომაზე დავით ხ.-ს განემარტა უფლებები, მათ შორის წარმომადგენლის დახმარების უფლების თაობაზე. ამასთან, იმის გათვალისწინებით, რომ სასამართლო სხდომა ექიმ-ნარკოლოგის პროცესზე მოწვევის მიზნით 2017 წლის 4 მაისს 13:00 საათისთვის გადაიდო, დავით ხ.-ს სრული შესაძლებლობა აქვს ისარგებლოს წარმომადგენლის/ადვოკატის დახმარებით"- აცხადებენ საქალაქო სასამართლოს საზოგადოებასთან ურთიერთობის სამსახურში.

ცნობისთვის, ადვოკატი არჩილ ჩუბინიძე "ნიუპოსტთან" აცხადებს, რომ დავით ხარშილაძე სასჯელაღსრულების დაწესებულებიდან ისე გაიყვანეს, რომ ამის შესახებ არც ერთი მისი უფლებადამცველი ინფორმირებული არ ყოფილა.