"მინდა, ჩემმა შვილებმა გაიგონ, რომ მათი მშობლები ჯაშუშები არ არიან" - სააპელაციოში "ფოტოგრაფების საქმის" განხილვა დაიწყო

სამართალი - 17:07, 20 Apr, 2017

2858

ჯაშუშობის ბრალდებით გასამართლებულმა ნათია გედენიძემ თბილისის სააპელაციო სასამართლოში მოსამართლეს შაუამდგომლობით მიმართა, რომ საქმეზე პროკურატურის მიერ გამოძიებული ახალი მტკიცებულებები მიიღოს.

გედენიძე მტკიცებულებების დაჩქარებული წესით განხილვას ითხოვს.

"ჩემთვის რთული იყო ამ ყველაფრის თავიდან მოსმენა როგორც დედისთვის. მინდა ჩემმა შვილებმა 5 წლის მერე მაინც გაიგონ, რომ მისი მშობლები არ არიან ჯაშუშები" - განაცხადა მან.

ჯაშუშობის ბრალდებით გასამართლებულმა გიორგი აბდალაძემ კი აღნიშნა, რომ მათ "დიდი ჯოჯოხეთი და უსამართლობა გავიარეს იმ ფოტოები გამო რომელიც 26 მაისს გადავიღეს".

"იურისტი არ ვარ, მაგრამ ვიცი რომ ასეთი მძიმე მუხლი ჩვენს კანონში არ არის. სამშობლოს ღალატი ყველაზე მძიმე მუხლია, არ მინდა ასეთი დაღით ვიარო. მე ოჯახი მყავს, ნათესავები, შვილი მყავს. ჩენ ვითხოვთ რაბლიტაციას და დაურთეთ საქმეს პროკურატურას შუადგომლობა. მე შვილით მემუქრებოდნენ, მითხრეს თუ არ აღიარებ დანაშაულს შეიძლება შენი შვილი ქუჩაში ავარიაში მოჰყვეს.

ჩვენ ჟურნალისტებმა გადაგვარჩინეს, რეზონანსი მოჰყვა ამ საქმეს, გთხოვთ დააჩქარეთ ამ საქმის გამოძიება"-განახადა გიორგი აბდალაძემ.

თბილისის სააპელაციო სასამართლოში "ფოტოგრაფების საქმეზე" თბილისის საქალაქო სასამართლოს 2011 წლის 22 ივლისს გამოტანილი გადაწყვეტილების გადახედვა დაიწყო.

პროკურატურა მათ მიმართ 6 წლის წინ გამოტანილი გამამტყუნებელი განაჩენის გამამართლებელით შეცვლას ითხოვს.

უწყების ინფორმაციით, საქმეზე ჩატარდა ხელახალი გამოძიება, დაიკითხნენ მოწმეები და დადასტურდა, რომ 2011 წელს ფოტორეპორტიორების დაკავება ჯაშუშობის გამოგონილი ბრალდებით მოხდა და მათზე ხელისუფლების მხრიდან ანგარიშსწორება 26 მაისის აქციის დაშლის აქტიური გაშუქების გამო მოხდა.