"პროკურატურამ შორენას სადეკანო დაკითხა, ყველა მათგანის ჩვენება სიტყვასიტყვით ჰგავდა ერთმანეთს"- გიორგი ფანცულაია

სამართალი - 10:02, 13 Apr, 2017

8396

ადვოკატის ინფორმაციით, ე.წ. ციანიდის საქმეზე პროკურატურამ საპატრიარქოს სამდივნოს 5 თანამშრომელი დაკითხა.

როგორც დაკავებული სასულიერო პირის ადვოკატები მედიასთან აღნიშნავენ, ყველა მათგანის ჩვენება სიტყვასიტყვით ჰგავდა ერთმანეთს, რაც ეჭვებს აჩენს.

გიორგი ფანცულაიას ინფორმაციით, მან პროკურატურიდან უკვე მიიღო საქმის ახალი მასალები, სადაც ახალი მოწმეების დაკითხვის ოქმები და ექსპერტიზის დასკვნებია.

„მათ შორენას სადეკანო დაკითხეს, რომლებიც საუბრობენ თუ რა კეთილი ქალბატონია შორენა. ამ საქმეში იყო რამდენიმე ექსპერტიზა დანიშნული, რამდენიმეზე პასუხი არის მოსული. ძირითადად ეხებოდა მამა გიორგი მამალძისგანტექნიკური საშუალებებს, რომელიც ამოიღეს, საქმის მასალიდან მასზე ჩატარდა ექსპერტიზები და შემიძლია გითხრათ, რომ არც იქ ჩანს, რომ მამა გიორგი მამალაძე ვინმეს მკვლელობას ამზადებდა,“-აცხადებს ადვოკატი გიორგი ფანცულაია.

ინფორმაციას, რომ საპატრიარქოს ადმინისტრაციისა და კანცელარიის თანამშრომლები დაიკითხნენ, ადასტირებს იურისტი ედიშერ ქარჩავა.

„დაიკითხნენ საქართველოს საპატრიარქოს თანამშრომლები, თანამშრომლები, სამოქალაქო პირები. ხუთი პიროვნება გამოიკითხა მოწმის სტატუსით და მათ მისცეს ჩვენება იმასთან დაკავშირებით, რაიმე ინფორმაცია ხომ არ გაუგიათ ციანიდთან ან გველის შხამთან დაკავშირებით. მათ მისცეს ჩვენება მე როგორც ვიცი, რომ მათ ინფორმაცია აღნიშნულის შესახებ უბრალოდ არ სმენიათ,“-განაცხადა ედიშერ ქარჩავამ.

როგორც ირკვევა კიდევ ერთხელ დაიკითხა საქმის ერთ-ერთი მთავარი მოწმეც ირმა ჭკადუაც.