ვინ დაესხა თავს გელა ხვედელიძეს - საქმეზე ელისო კილაძე მოწმის სახით დაკითხეს

სამართალი - 12:48, 08 Apr, 2017

4285

შს მინისტრის ყოფილი მოადგილის გელა ხვედელიძის ცემის ფაქტზე ჟურნალისტი ელისო კილაძე მოწმის სახით დაკითხეს. გაზეთ „ქრონიკა+“-ის რედაქტორი გამოძიებას წყაროს მიერ მიწოდებულ ინფორმაციაზე ესაუბრა. კილაძის თქმით ხვედელიძე ე.წ „სპორტსმენმა ზონდერებმა“ სცემს, რომლებიც სუს-ის მაღალჩინოსნის სოსო გოგაშვილის დავალებით მოქმედებდნენ:

„სწორედ ამ სოსო გოგაშვილის ზონდერჯგუფის მოჭიდავეები იყვნენ ისინი, ვინც გელა ხვედელიძეს თავს დაესხნენ, ამ ზონდერ ჯგუფის კურატორი ზაქარია კევლიშვილთან ერთად არის გიორგი კევლიშვილი. გიორგი კევლიშვილი იყო სოდ-ის მაღალჩინოსანი, ასევე ზონდერი, 2012 წლის არჩევნების წინ ის იტაცებდა და აშინებდა „ქართული ოცნების“ მომხრეებს. ქართული ოცნების ხელისუფლებაში მოსვლის შემდეგ კი ის სამსახურში დააბრუნეს ირაკლი ღარიბაშვილის სიმამრის თამაზ თამაზაშვილის რეკომენდაციით. ანუ ჩემი წყარო ამბობს, რომ ძმები ზაქარია და გიორგი კევლიშვილები არიან იოსებ გოგაშვილის ბიძაშვილის შვილები, მათ დედა ჰყავთ გოგაშვილი, არიან ადამიანები რომლებიც კურატორობენ ზონდერების ჯგუფს. ზონდერების დისლოკაციის ადგილი არის ქალაქი თელავი.“- განაცხადა ელისო კილაძე.