რუსთავი 2-ის საქმეზე უზენაესი სასამართლოს დიდი პალატის დასაბუთებული გადაწყვეტილების ჩაბარების ვადა იწურება და როგორც სასამართლოს თავმჯდომარე განმარტავს, დოკუმენტი მხარეებს დღეს, დღის ბოლომდე ჩაბარდება.

ნინო გვენეტაძის განცხადებით, ამ გადაწყვეტილებაში არის პასუხი ყველა კითხვაზე, რომელიც რუსთავი 2-ის საქმესთან დაკავშირებით საზოგადოებას და მხარეებს გაუჩნდათ. სასამართლოს თავმჯდომარემ, დიდი პალატის დაკომპლექტების საკითხზეც ისაუბრა, მაგრამ დეტალები არ განმარტა.

„ყველა კითხვაზე პასუხი, რომელიც თქვენ გაწუხებთ ან საზოგადოებას გაუჩნდა, არის გადაწყვეტილებაში და იმ განჩინებაში, რომელიც დღეს იქნება მხარეებისათვის ჩაბარებული. სასამართლო ხელისუფლება იცავს იმ მაღალ სტანდარტს, რომელიც არა მხოლოდ ეთიკური პრინციპია, არამედ საკანონმდებლო მოთხოვნაა, რომ დასაბუთებული გადაწყვეტილების გამოქვეყნებამდე არ ყოფილიყო კომენტარი გაკეთებული.

რაც შეეხება კითხვას დიდი პალატის ფორმირებასთან დაკავშირებით, ის, რაც კანონმდებლობით გათვალისწინებული იყო, აბსოლუტურად ყველა ინფორმაცია დროულად, კანონმდებლობის მოთხოვნათა დაცვით მიეწოდათ მხარეებს და გავრცელდა სასამართლოს ვებგვერდზე“, - განაცხადა ნინო გვენეტაძემ.