შსს-ს განცხადება შოთა პაკელიანის დაკავებაზე - უწყება ბრალდებულის ცემას და შეურაცხყოფას უარყოფს

სამართალი - 09:59, 31 Mar, 2017

3299

შინაგან საქმეთა სამინისტრო გამოეხმაურა ბრალდებულ შოთა პაკელიანის ბრალდებას, რომელიც სამართალდამცავებ ს „ბიოს“ ჩადებასა და ცემაში ადანაშაულებს. უწყებაში ცემის და შეურაცხყოფის ფაქტს უარყოფენ და აცხადებენ, რომ ბრალდებულმა დაზიანებები მიმალვის დროს, წაქცევისას მიიღო:

"მიმდინარე წლის 23 მარტს თბილისში, ისანი-სამგორის რაიონში, პოლიციელებმა, ოპერატიული ინფორმაციის საფუძველზე, გადამოწმების მიზნით შეაჩერეს 1990 წელს დაბადებული, ამჟამად პირობითი მსჯავრის ქვეშ მყოფი შოთა პ., რომელიც არ დაემორჩილა სამართალდამცველთა კანონიერ მოთხოვნას და მიმალვა სცადა, რა დროსაც წაიქცა და სხეულზე (სახის, ხელის და მუხლის არეში) მიიღო დაზიანებები.პოლიციამ, შოთა პ.-ს პირადი ჩხრეკისას, 0,0664 გრამი ნარკოტიკული საშუალება - ე.წ. „ბიო“ ამოიღო.პოლიციის განყოფილებაში მიყვანის შემდეგ დაკავებული შეუძლოდ გახდა, რის გამოც გამოძახებული იქნა სასწრაფო სამედიცინო დახმარების ბრიგადა და იგი თბილისის N1 კლინიკურ საავადმყოფოში გადაიყვანეს.

საავადმყოფოში შოთა პ.-მ მორიგე ექიმს განუცხადა, რომ მას ე.წ. „ბიო“ ჰქონდა გადაყლაპული. ბრალდებულის სახით დაკითხვისას შოთა პ.-მ განაცხადა, რომ ნარკოტიკული საშუალება იპოვა და როდესაც პოლიციელები მის შეჩერებას ცდილობდნენ, აღნიშნული ნარკოტიკის ნაწილი მიმალვის მცდელობის დროს გადაყლაპა, რის გამოც შემდგომში შეუძლოდ გახდა.რაც შეეხება სხეულზე არსებულ დაზიანებებს, ბრალდებულის განმარტებით, მან ეს დაზიანებები მიმალვის დროს, წაქცევის შედეგად მიიღო. იგი აცხადებს, რომ პოლიციის მიმართ პრეტენზია არ გააჩნია. მიმდინარე წლის 29 მარტს შოთა პ.-ს ბრალი წარედგინა საქართველოს სსკ-ს 260-ე მუხლის მე-3 ნაწილის „დ“ და „ე“ ქვეპუნქტებით. თბილისის საქალაქო სასამართლოს მიერ აღკვეთის ღონისძიების სახით მას პატიმრობა შეეფარდა. შოთა პ. ანალოგიური დანაშაულისთვის 2016 წელსაც იყო დაკავებული.პოლიციის მიმართ მისი მხრიდან რაიმე სახის პრეტენზიის არსებობის შემთხვევაში, საქმის მასალები გამოსაძიებლად პროკურატურას გადაეცემა"- აღნიშნულია შსს-ს განცხადებაში.

ბრალდებულის ადვოკატის თქმით მისი დაცვის ქვეშ მყოფს ცემის აშკარა ნიშნები აღენიშნება, ხოლო თავად ის ფაქტი, რომ მას სცემეს, ისან-სამგორის პოლიციის განყოფილებაში მისულმა პირებმა კამერით გადაიღეს, სადაც ისმის, თუ როგორ ითხოვს იგი პოლიციელებისგან, რომ არ დაარტყან.

„როგორც პოლიციელები ამბობენ, შოთა მათ დანახვაზე გაიქცა, წაიქცა და დაინახეს, როგორ ჩაიყო ხელი ჯიბეში და გადაყლაპა. სამი შეკვრა ჰქონდა და ერთი დარჩა ჯიბეშიო. პოლიციის განყოფილებაში სასწრაფო სამედიცინო დახმარება 3-ჯერ გამოიძახეს. როცა კომაში ჩავარდა, მესამემ რეანიმაციულ განყოფილებში წაიყვანა, სადაც სამი დღე იყო. ამბობს, რომ პოლიციელებმა 15-20-ჯერ დაარტყეს. ექსპერტიზის ჩატარება ვითხოვეთ, მაგრამ არ გვაქცევენ ყურადღებას. დღე სასამართლომ აღკვეთის ღონისძების სახით 50 დღით პატიმრობა შეუფარდა“ - აცხადებს ადვოკატი. მისივე განმარტებით, ბრალდებული ამბობს, რომ პოლიციელებმა მისი პატივი და ღირსება შელახეს, რადგან განყოფილებაში იგი უცხო პირების თანდასწრებით გააშიშვლეს და ბუქნები აკეთებინეს.