დეკანოზ გიორგი მამალაძის ადვოკატები სასამართლოს გადაწყვეტილებას გაასაჩივრებენ

სამართალი - 10:14, 29 Mar, 2017

1611

დეკანოზ გიორგი მამალაძის ადვოკატები სასამართლოს მიერ გუშინ მიღებულ გადაწყვეტილებას გაასაჩივრებენ.
დაცვის მხარე "შერჩევით სამართალზე" ამახვილებს ყურადღებას.

მიხეილ რამიშვილის განცხადებით,საქალაქო სასამართლოს გადაწყვეტილება, დეკანოზის მამალაძის დატოვებასთან დაკავშირებით, აბსურდული იყო.

”ჩვენთვის თავიდანვე ცნობილი იყო, რომ მოსამართლეს წინასწარ ჰქონდა გადაწყვეტილება მიღებული, ვინაიდან სათათბიროდ სულ რამდენიმე წუთით იყო გასული. მოსამართლემ ე.წ. დასაბუთება გააკეთა, რომ თურმე მამა გიორგის მხრიდან მოწმეებზე ზეწოლის საშიშროება არსებობს, მათ შორის მთავარ მოწმეზე, რომელიც დაცვასთან ერთად დადის. ძალიან აბსურდული საკითხი წამოწია მოსამართლემ და მიიღო გადაწყვეტილება. შემიძლია სრული პასუხისმგებლობით ვთქვა, რომ საქართველოში მართლმსაჯულება არ არსებობს. საქართველოში არის ყველანაირი სამართლებრივი ჩარჩოდან გასული შერჩევითი სამართალი” - განაცხადა მიხეილ რამიშვილმა.

დაცვის მხარისთვის მიუღებელია ის არგუმენტები, რის საფუძველზეც საქალაქო სასამართლომ დეკანოზს არ შეუცვალა აღკვეთის ღონისძიება პატიმრობა 20 ათას ლარიანი გირაოთი. შესაბამისად დაკმაყოფილდა პროკურატურის შუამდგომლობა წინასასამართლო სხდომის თარიღის გადადების თაობაზე.

ჟურნალისტები დაინტერესდნენ ვისი ინტერესი არსებობს სასულიერო პირის პატიმრობაში ყოფნასთან დაკავშირებით, რაზეც ადვოკატმა აღნიშნა: "აქ ვგულისხმობ ყველანაირ წრეს, როგორც საეროს, ასევე სასულიეროს".
ცნობილია, რომ ე.წ. ციანიდის საქმეზე სტრასბურგში გასაგზავნ სარჩელს ამზადებს ადამიანის უფლებათა ცენტრი. ისინი პროკურატურის მიერ ადვოკატებისთვის გაუთქმელობის ვალდებულების დაკისრებას ასაჩივრებენ.