მძღოლი რომელიც მიმდინარე წლის 22 მარტს, აღმაშენებლის ხეივანში დედა-შვილს BMW-ს მარკის ავტომობილით შეეჯახა, თავს დამნაშავედ ცნობს და პროკურორის შუამდგომლობას პატიმრობას ეთანხმება.

როგორც თორნიკე ტუღუშის ადვოკატმა ჟურნალისტებს განუცხადა, ბრალდებული ნანობს მომხდარს და ურჩევნია თავი არ იმართლოს.

"ნანობს, ურჩევნია არ იბრძოლოს, თავი არ იმართლოს და პატიმრობაში იყოს"- განაცხადა ადვოკატმა.

საქმის მასალების თანახმად, 2017 წლის 22 მარტს, თორნიკე ტუღუში „საგზაო მოძრაობის“ შესახებ საქართველოს კანონის მოთხოვნათა დარღვევით, გადაჭარბებული სიჩქარით მოძრაობდა მისი მართვის ქვეშ მყოფი BMW-ს მარკის ავტომობილით, რა დროსაც შეეჯახა მის წინ მოძრავ ავტომობილს. შეჯახების შედეგად, მეორე ავტომობილი გადავიდა გზის სავალი ნაწილიდან და ქვეითთა სავალ ტროტუარზე მყოფ დედა-შვილს დაეჯახა. გოგონა ადგილზე გარდაიცვალა.

როგორც ირკვევა მანვე, 2016 წლის 5 ნოემბერს, დაახლოებით 02:57 საათზე, თბილისში, პეკინისა და უსახელოს ქუჩების კვეთაზე, დაარღვია ,,საგზაო მოძრაობის შესახებ“ საქართველოს კანონის მოთხოვნები და უკუსვლით დაეჯახა ქვეითად მოსიარულე ე.გ.-ს, რომელმაც შეჯახების შედეგად მიიღო ჯანმრთელობის ნაკლებად მძიმე ხარისხის დაზიანება.