რამდენად კონსტიტუციურია საპატრიარქოს საგადასახადო შეღავათები- რას აცხადებენ საპატრიარქოში

სამართალი - 12:36, 24 Mar, 2017

1482

საკონსტიტუციო სასამართლო საპატრიარქოს ზოგიერთი საგადასახადო პრივილეგიის კონსტიტუციურობას განიხილავს, საქართველოში მოქმედი რელიგიური კონფესიები ასაჩივრებდნენ საქართველოს საგადასახადო კოდექსით მართლმადიდებელი ეკლესიისთვის დადგენილ ზოგიერთ შეღავათს და კანონის წინაშე თანასწორობას ითხოვენ.

არასამთავრობო ორგანიზაცია საქართველოს დემოკრატიული ინიციატივას თავმჯდომარის, გიორგი მშვენიერაძის თქმით საკონსტიტუციო სასამართლომ განსახილველად მიიღო სარჩელის ის ნაწილი, სადაც მოსარჩელეები ითხოვდნენ ხვადასხვა საკულტო ნაგებობების მშენებლობა, მოხატვა-რეკონსტრუქციის დროს დამატებითი ღირებულების გადასახადთან დაკავშირებით კანონის წინაშე თანასწორობას:

„საპატრიარქოს დაკვეთით ხდება სხვადასხვა საკულტო ნაგებობების მშენებლობა, მოხატვა-რეკონსტრუქცია, ამ შემთხვევაში დამატებითი ღირებულების გადასახადისგან გათავისუფლებულია საპატრიარქო, მსგავსი რეგულაცია არ არ არსებობს სხვა რელიგიურ კონფესიებთან მიმართებაში, ამ ნაწილში მიიღო საკონსტიტუციო სასამართლომ განსახილველად საქმე“- განაცხადა გიორგი მშვენიერაძემ „მოამბესთან“.

ევანგელურ-ბაპტისტური ეკლესიის ეპისკოპოსის რუსუდან გოცირიძის თქმით სარჩელის მთავარი არსი დისკრიმინაციული მიდგომის აღმოფხვრაა:

„კანონის წინაშე თანასწორობის აღდგენაზეა ლაპარაკი, რომ არ იყოს დისკრიმინაციული მიდგომა. თუკი ის, რაც ერთ კონკრეტულ რელიგიურ თემთან არის სამართლიანი და კარგი პრაქტიკა, სასურველია რომ სხვებთან მიმართებაშიც იყოს. თუკი ეს ერთი გამონაკლისი მთლად სამართლიანი მოვლენა არ არის მაშინ უსამართლო პრაქტიკის დამყარება ნამდვილად არ გვინდა და იყოს თანასწორი მიდგომა კანონის მხრიდან.“- განაცხადა რუსუდან გოცირიძემ „მოამბესთან“.

სარჩელის არსს არ ეთანხმება საპატრიარქოს იურისტი ედიშერ ქარჩავა, მისი თქმით საქართველოს ეკლესიასა და სახელმწიფოს შორის ხელშეკრულება არსებობს, რომელიც ამ შეღავათების დაწესებას ითვალისწინებს და სხვადასხვა რელიგიური კონფესიების მოთხოვნა, რომ დომმინანტ ეკლესიას გაუთანაბრდნენ უსაფუძვლოა:

კონსტიტუციური შეთანხმების შედეგად საქართველოს ეკლესიას სახელმწიფოსგან გააჩნია ხელშეკრულება. ეკლესიას აქვს გარკვეული შეღავათების ქონის უფლება, ამიტომ მათი მოთხოვნა რომ გათანაბრდნენ დომინანტ ეკლესიასთან მათი მდგომარეობა, არის სრულიად უსაფუძვლო . ბაპტისტური ეკლესია მსგავსი მოთხოვნით იყო გამოსული კათოლიკური ეკლესიის წინააღმდეგ და სტრასბურგის სასამართლომ მათი მოთხოვნა არ დააკმაყოფილა.“- განაცხადა ედიშერ ქარჩავამ „მოამბესთან“.