დეკანოზ გიორგი მამალაძის ადვოკატები წმინდა სინოდის 16 წევრის გამოკითვას ითხოვს, მათ შუამდგომლობას თბილისის საქალაქო სასამართლომ დღეს 16:00 საათამდე უნდა უპასუხოს. აღნიშნული მოთხოვნით სასულიერო პირის უფლებადამცველებმა საპატრიარქოსაც მიმართეს, ტუმცა, საპატრიარქოს ადვოკატი მათ მოთხოვნას დაუსაბუთებლად მიიჩნევს.

„ახალი კოდექსით აღნიშნული მუხლის განხორციელება, მხოლოდ 2018 წლის 1-ლი იანვრიდან შედის კანონიერ ძალაში. ამდენად ჩვენ მივუთითეთ პროცესუალურ დარღვევაზე, რის შედეგადაც ეთქვათ უარი ადვოკატებს,“-განაცხადა ედიშერ ქარჩავამ.

საპატრიარქოს ადვოკატს დეკანოზის უფლებადამცველმა მიხეილ რამიშვილმა უპასუხა:

„მსურს ბატონ ედიშერ ქარჩავას შევახსენო, მან ბრძანა, რომ თურმე ჩვენ არასწორად აღვნიშნეთ ჩვენს განცხადებაში, წმინდა სინოდის წევრებს როცა მივმართეთ, სისხლის სამართლის საპროცესო კოდექსი, 113-ე მუხლი არ არის გაუქმებული, მოქმედია და 2016 წლის 20 თებერვლიდან მოქმედებს. ამის შემდეგ ჩვენ მივმართეთ სასამართლოს, რადგან საპროცესო კოდექსის 113-ე მუხლში მითითებულია, როდესაც პირი ნებაყოფლობით არ იძლევა ჩვენებას და ინფორმაციას საქმესთან მიმართებით, შესაძლებელია სასამართლოს და მოსამართლის წინაშე მოხდეს მისი დაკითხვა“, - განაცხადა მიხეილ რამიშვილმა.