ბავშვთა სამყაროს დაწვის შედეგად დაზარალებულების მიერ მთავრობისათვის მიცემული 24-საათიანი ვადა, დღეს, 15:00 საათზე იწურება. ისინი პრემიერთან შეხვედრას ითხოვენ, ამ მოთხოვნით კი კანცელარიასთან უკვე ორი კვირაა შიმშილობენ. მათი ნაწილი შიმშილობას ბავშვთა სამყაროს დამწვარ შენობასთან აგრძელებს.

შენობის დაწვის შედეგად დაზარალებულები პროკურატურას საჩივრით მიმართავენ, ისინი გუშინ, მთავრობის ადმინისტრაციასთან მომხდარ ფაქტს აპროტესტებენ. მოვაჭრეებსა და სამართალდამცავებს შორის ვითარება მას შემდეგ დაიძაბა, რაც დაზარალებულებმა შენობასთან კარავი გაშალეს.

„დღეს ჩვენ ვაპირებთ მთავარ პროკურატურაში საჩივრის შეტანას იმ ადამიანების, იმ საპატრულო პოლიციისა და დაცვის სამსახურის მიმართ, რომლებმაც განახორციელეს უკანონობა, სისხლის სამართლის წესით დასჯადია შეკრებისა და მანიფესტაციის ხელყოფა. ეს ადამიანები გამოყარეს კარვიდან, დახიეს, გაიტაცეს კარავი და გაიქცნენ. აქედან გამომდინარე, ვააცხადებთ, რომ ეს არის სისხლის სამართლის დანაშაული, რაზეც პასუხი უნდა აგოს ყველა იმ ადამიანმა, ვინც მონაწილეობდა და ძალადობაში“, - აცხადებს დაზარალებულების ადვოკატი.