ბერა ივანიშვილთან დაკავშირებით გაჟღერებულ ბრალდებებზე შსს მორიგ განმარტებას აკეთებს

სამართალი - 18:04, 21 Mar, 2017

7526

შინაგან საქმეთა სამინისტროს განცხადებით, ინფორმაცია, რომ ბერა ივანიშვილთან ინციდენტის გამო, პოლიციელები დაითხოვეს სრული სიცრუეა.

როგორც "ნიუპოსტს" შს სამინისტროდან აცნობეს, არც ერთ პირს, ვინც თითქოსდა მომხდარ ინციდენტთან დაკავშირებით მედიასაშუალებებით კომენტარს აკეთებს, არანაირი შეხება არ აქვს შინაგან საქმეთა სამინისტროსთან.

"გვსურს, გამოვეხმაუროთ მედიასაშუალებებით გავრცელებულ ინფორმაციას იმის თაობაზე, რომ ბერა ივანიშვილთან დაკავშირებული ინციდენტის გამო შსს-ს თბილისის პოლიციის დეპარტამენტის ძველი თბილისის სამმართველოდან დათხოვნილი იქნა 9 თანამშრომელი.

აღნიშნული ინფორმაცია სრული სიცრუეა. კატეგორიულად ვაცხადებთ, რომ თბილისის პოლიციის დეპარტამენტის არც ერთ სამმართველოში ბერა ივანიშვილთან დაკავშირებით მომხდარ ინციდენტს ადგილი არ ჰქონია და არ ფიქსირდება არც ერთი ფაქტი, რომელსაც აღნიშნულ პირთან რაიმე სახით შემხებლობა ექნებოდა.

ამასთან, სიმართლეს არ შეესაბამება ინფორმაცია იმის თაობაზეც, რომ თბილისის პოლიციის დეპარტამენტის ძველი თბილისის სამმართველოდან დათხოვნილი იქნა 9 თანამშრომელი.

აქვე განვმარტავთ, რომ პოლიციის დეპარტამენტებსა და სამმართველოებში, ოპერატიული საქმიანობის სპეციფიკიდან და სხვა ობიექტური მიზეზებიდან გამომდინარე, საკადრო გადაადგილებები პერიოდულად ხორციელდება.

ამასთან, შევნიშნავთ, რომ არც ერთ პირს, ვინც თითქოსდა მომხდარ ინციდენტთან დაკავშირებით მედიასაშუალებებით კომენტარს აკეთებს, არანაირი შეხება არ აქვს შინაგან საქმეთა სამინისტროსთან. შესაბამისად, ჩნდება საფუძვლიანი ეჭვი, რომ მსგავსი განცხადებები მხოლოდ შსს-ს დისკრედიტაციას და კონკრეტულ პოლიტიკურ მიზნებს ემსახურება"- აღნიშნავენ შს სამინისტროში.

ცნობისთვის, ოპოზიციის ინფორმაციით, ძველი თბილისის პოლიციის 9 ყოფილი თანამშრომელი სამსახურიდან ერთდროულად მას შემდეგ დაითხოვეს, რაც ყოფილი პრემიერმინისტრის შვილის მეგობარი დააკავეს.

დღეს ფაქტის გამოძიებასა და მათი სამსახურიდან გათავისუფლების კანონიერების დადგენის მოთხოვნით პოლიციელთა ასოციაციის წევრებმა მთავარ საგამოძიებო უწყებას მიმართეს.