უზენაესი სასამართლოს გადაწყვეტილება - რუსთავი 2-ის საქმის მოსამართლე პირველ კომენტარს აკეთებს

სამართალი - 12:11, 17 Mar, 2017

7597

უზენაესი სასამართლოს მოსამართლე ზურაბ ძლიერიშვილი, რომელიც რუსთავი 2-ის საქმის განმხილველი დიდი პალატის შემადგენლობაში იყო მედიასთან პირველ კომენტარს აკეთებს.

ძლიერიშვილი ირწმუნება, რომ მოსამართლეებზე პოლიტიკური ზეწოლა არ ყოფილა.

უზენაესი სასამართლოს მოსამართლეს სტრასბურგის ადამიანის უფლებათა სასამართლოს გადაწყვეტილებასთან დაკავშირებაც ჰკითხეს, თუმცა ძლიერიშვილმა საკითხზე კომენტარი არ გააკეთა.

„დაელოდეთ დიდი პალატის დასაბუთებულ მოტივირებულ გადაწყვეტილებას, სადაც თქვენ ნახავთ ბუნებრივია იმ მოტივაციას, რატომ მივიდა დიდი პალატა ამ გადაწყვეტილებამდე და ბუნებრივია, ამის მერე შეიძლება იქნეს პასუხები გაცემული, როგორც სამოტივაციო ნაწილზე, ასევე სხვა დანარჩენ საკითხებზე.

სამოსამართლეო ეთიკა არ მაძლევს იმის შესაძლებლობას წინასწარ აზრი გამოვთქვა იმასთან დაკავშირებით, რაც ამ შემთხვევაში ჩემი კომპეტენცია არ არის," - აღნიშნა ზურაბ ძლიერიშვილმა.

მოსამართლე ზურაბ ძლიერაშვილი ამბობს, რომ საქმის განსახილველად კოლეგია არა ორი დღე არამედ რამდენიმე თვე ჰქონდა.

„თქვენ ნახავთ საქმის მასალებში რომ ეს არის არასწორი ინფორმაცია, კოლეგიას ჰქონდა არა ორი დღე, არამედ რამდენიმე თვის ვადა,“ - აცხადებს ძლიერიშვილი.