რატომ აიღო გერმანიაში გამგზავრებამდე დეკანოზმა 30 000 ლარი სესხი - დაკავებული სასულიერო პირის დაკითხვა გრძელდება

სამართალი - 17:44, 13 Mar, 2017

17626

სასჯელაღსრულების მე-9 დაწესებულებაში ე.წ. ციანიდის საქმეზე მამა გიორგი მამალაძის დაკითხვა ამ დრომდე გრძელდება.

შესვენებისას დაკავებულის ადვოკატებმა განცხადებები გააკეთეს. მათი თქმით, პროკურატურის წარმომადგენლებს ციანიდის შეძენის თაობაზე კითხვები არ დაუსვამთ.

ადვოკატების განცხადებით, ბრალდების მხარე პროკურატურის მიერ მოპოვებული ვიდეოჩანაწერების შესახებ უსვამს კითხვებს დაკავებულს.

ჟურნალისტების კითხვაზე, კონკრეტულად რა აინტერესებდათ პროკურორებს, მამა გიორგის უფლებადამცველებმა საუბარი არ ისაუბრეს.

მიხეილ რამიშვილის თქმით, საქმეში ჯერჯერობით პატრიარქის დაცვის ყოფილი უფროსი სოსო ოხანაშვილი არ ფიგურირებს.

“პროკურატურის კითხვებს ვერ დავარქმევ კრიტიკულს, ყველა ამ კითხვას მამა გიორგიმ გასცა ამომწურავი პასუხი. მეტი კონკრეტიკისგან თავს შევიკავებ, რადგან დაკითხვის პროცედურა არ დასრულებულა. ციანიდზე იყო კითხვები, თუმცა ვისგან შეიძინა მამა გიორგიმ ციანიდი, ჯერჯერობით ეგ კითხვა არ დასმულა” - აღნიშნა რამიშვილმა.

რამიშვილმა დღეს ჟურნალისტებს ისიც უთხრა, რომ გამოძიებამ წმინდა სინოდის წევრებიც უნდა დაკითხოს.

„უნდა მოხდეს სინდოდის ბევრი წევრის დაკითხვა“ - განაცხადა რამიშვილმა.

რაც შეეხება მამა გიორგი მამალაძის მიერ გერმანიაში გამგზავრებამდე 30 000 ლარის ოდენობის სესხის აღებას, დაცვის მხარე ადასტურებს, რომ დეკანოზმა ეს სესხი გამოიტანა, თუმცა რა მიზნით, მათთვის ჯერ უცნობია.

რამიშვილის განცხადებით, „კრედიტის აღება დანაშაული არ არის“.

“საუბარი იმაზე, რომ ვინმეს უნდა გადმოეგზავნა ფული და შემდეგ მოხდებოდა ციანიდის შეძენა, სრული აბსურდია. ადამიანმა კრედიტი აიღო, იყო წასასვლელი თანხა, კრედიტისაღება დანაშაული არ არის”, - აღნიშნა რამიშვილმა.

ე.წ. მატროსოვის დაწესებულებიდან არ გამოსულა საქმის პროკურორები. ბრალდებული დეკანოზის დაკითხვა 10:00 საათზე დაიწყო.