"მამა გიორგი ე.წ კრიტიკულ კითხვებზე პასუხის გასაცემად მზად არის"

"მამა გიორგი ე.წ კრიტიკულ კითხვებზე პასუხის გასაცემად მზად არის" - დაკავებული დეკანოზის ადვოკატი

სამართალი - 10:30, 10 Mar, 2017

2971

ე.წ ციანიდის საქმეზე დაკავებულ დეკანოზი გიორგი მამალაძეს მისი ადვოკატი მიხეილ რამიშვილი დღეს, დღის მეორე ნახევარში შეხვდება.

როგორც "ნიუპოსტს" მიხეილ რამიშვილმა განუცხადა, მამა გიორგი "დაკითხვის გაგრძელებისთვის მზადყოფნას გამოთქვამს".

მისივე თქმით, პროკურატურას მტკიცებულებების ნაწილის გამოქვეყნების შემდეგ მამალაძის დაკითხვის მოთხოვნა არ დაუყენებია.

"დაკითხვას რაც შეეხება, პროკურატურიდან არავინ შეგვხმიანებია. ველოდებით და მზაობას გამოვთქვამთ დაკითხვის გაგრძელებისთვის. ე.წ. კრიტიკულ კითხვებზე, რაზეც პროკურატურამ არაერთხელ ისაუბრა მზად ვართ პასუხი გავცეთ"- აღნიშნა მიხეილ რამიშვილმა.

ცნობისთვის, მამა გიორგიმ პროკურატურას მიმართა და მისი ოჯახის უსაფრთხოების დაცვა მოითხოვა. დეკანოზი აცხადებდა, რომ გამოძიების კითხვებს სწორედ ამის შემდეგ უპასუხებდა.

არსებული ინფორმაციით, ქობულეთში დეკანოზ გიორგი მამალაძის სახლთან სამი ავტომობილი შეინიშნება, მანქანები სავარაუდოდ პროკურატურის მიერ დანიშნულ სახელმწიფო დაცვას ეკუთვნის. აღნიშნული ავტომანქანებით გადაადგილდებიან დეკანოზ მამალაძის ოჯახის წევრებიც.