სტრასბურგის სასამართლოში მერაბიშვილის საქმის ხელახალი განხილვა დღეს დაიწყება

სამართალი - 09:57, 08 Mar, 2017

1947

დღეს, 8 მარტს სტრასბურგის ადამიანის უფლებათა სასამართლოს დიდი პალატა ივანე მერაბიშვილის საქმეზე, საქართველოს მთავრობის საჩივარს განიხილავს. სასამართლოს დიდი პალატა 17 მოსამართლის შემადგენლობით ხვალინდელ ზეპირ სხდომაზე საქმის განხილვას თავიდან დაიწყებს.

საქართველოს მთავრობის საჩივრის მიხედვით, იუსტიციის სამინისტრომ ვანო მერაბიშვილის საქმეზე ამავე სასამართლოს ერთ-ერთი პალატის მიერ 2016 წლის 14 ივნისს გამოტანილი გადაწყვეტილება გაასაჩივრა.

მერაბიშვილის ადვოკატის განმარტებით, სასამართლომ უნდა დაადგინოს დაირღვა თუ არა ადამიანის უფლებათა ევროპული კონვენცია.

„8 მოსამართლისგან შემდგარმა სექციამ ერთხმად დაადგინა, რომ ვანო მერაბიშვილის პატიმრობა არ ემსახურებოდა კანონიერ მიზნებს და შეფარული პოლიტიკური დღის წესრიგი ამოძრავებდა საქართველოს ხელისუფლებას. შემდგომ ეს გადაწყვეტილება გაასაჩივრეს დიდ პალატაში და ჩვენ დიდი პალატის ზეპირი მოსმენა გვაქვს ხვალ. დიდი პალატა იმსჯელებს ვანო მერაბიშვილის საქმეზე და დაადგენს მერაბიშვილის საქმეზე დაირღვა ევროპის კონვენცია თუ არა. იმ შემთხვევაში თუ ამგვარი დადგინდება შემდგომ ხელისუფლებას მოუწევს მერაბიშვილის გათავისუფლება და ასევე სხვა ყველა პოლიტპატიმრის საქმის გადახედვა,“-განაცხადა ოთარ კახიძემ.

ცნობისთვის, 2016 წლის 13 სექტემბერს საქართველოს მთავრობამ გაასაჩივრა სტრასბურგის ადამიანის უფლებათა სასამართლოს 14 ივნისის გადაწყვეტილება, რომლის მიხედვით სტრასბურგის სასამართლოს პალატამ 7 მოსამართლის შემადგენლობით ერთხმად დაადგინა, რომ ივანე მერაბიშვილის წინასწარი პატიმრობა იყო კანონიერი. თუმცა, გაჩნდა კითხვის ნიშანი 2013 წლის 14 დეკემბერს მერაბიშვილის საკნიდან სავარაუდო გაყვანის ეპიზოდთან დაკავშირებით. საქმის განხილვა დღესვე დასრულდება, თუმცა როდის გამოიტანს დიდი პალატა გადაწყვეტილებას უცნობია.