სტრასბურგის სასამართლოს გადაწყვეტილებას ქიბარ ხალვაშის ადვოკატი გამოეხმაურა

სამართალი - 21:14, 07 Mar, 2017

20715

სტრასბურგის სასამართლოს მიერ მიღებულ გადაწყვეტილებას, რომლიც „რუსთავი2“-ის საქმეზე აღსრულების ღონისძიების საქმის განხილვის დასრულებამდე შეჩერებას ეხებოდა, ქიბარ ხალვაშის ადვოკატი პაატა სალია გამოეხმაურა. როგორც ადვოკატმა მოამბესთან სატელეფონო საუბარში განაცხადა ამ ეტაპზე ის არ იცნობს მასალებს რომელიც მომჩივანმა და მოპასუხე მხარე-სახელმწიფომ სასამართლოში წარადგინა. ხალვაშის მხარე კვლავ საქმეში მესამე მხარედ ჩართვას ითხოვს:

„ამ ეტაპზე ჩვენ ვიცით მხოლოდ ფაქტი რომ აღსრულების შეზღუდვა საქმის განხილვის დასრულებამდე გაგრძელდა. ამ ეტაპზე ჩვენ გადაწყვეტილების შინაარს არ ვიცნობთ, არც ის ვიცით თუ რა მასალები წარადგინა მომჩივანმა და მოპასუხე მხარე-სახელმწიფომ. სწორედ ამიტომ ვითხოვდით მესამე მხარედ ჩართვას, რომ ჩვენი პოზიციები წარვადგინოთ სასამართლოში.“- განაცხადა სალიამ.

ადვოკატის თქმით მას არ შეუძლია ისაუბროს, თუ როდის შეიძლება დაასრულოს ევროსასამართლომ რუსთავი2-ის საქმის განხილვა, რადგან კონკრეტული ვადები კონვენციით განსაზღვრულია არაა. ამასთანავე სალიამ იმ პროცესებზეც ისაუბრა, რომელიც სტრასბურგის სასამართლოს მიერ მომავალში გამოტანილ განაჩენს მოჰყვება საქართველოს სასამართლო სისტემაში.

„სტრასბურგის სასამართლო მფლობელის შესახებ გადაწყვეტილებას ვერ მიიღებს, ეს ეროვნულმა სასამართლომ უნდა გადაწყვიტოს. სტრასბურგის სასამართლო მსჯელობს იმაზე დაირღვა თუ არა სამართლიანი სასამართლოს უფლება რ2-ის წარმომადგენლების მიმართ. თუ ამას ასე ჩათვლის ეს საქართველოში პროცესის ხელახლა დაწყების საფუძველი გახდება და არა გადაწყვეტილების გაუქმების.“- განაცხადა სალიამ.