"შეიძლება ითქვას მამა გიორგის დაკავება კი არა, მოტაცება მოხდა"

"შეიძლება ითქვას მამა გიორგის დაკავება კი არა, მოტაცება მოხდა" - რა დარღვევებზე საუბრობს ადვოკატი

სამართალი - 16:00, 06 Mar, 2017

2083

მკვლელობის მომზადებაში ბრალდებული დეკანოზის ადვოკატის თქმით, მამა გიორგი მამალაძის დაკავების დროს მთელ რიგ პროცედურულ დარღვევებს ქონდა ადგილი. ამის შესახებ განცხადება მიხეილ რამიშვილმა ე.წ „მატროსოვის ციხიდან“ გამოსვლის შემდეგ გააკეთა. ადვოკატის თქმით, პირები რომლებმაც დეკანოზი დააკავეს, მამა გიორგი მამალაძეს იმ ტრანსპორტში ელოდებოდნენ, რომელსაც ის თვითმფრინავამდე უნდა მიეყვანა და დაკავების დროს მასზე გარკვეული ფიზიკური შეხებაც მოახდინეს:

„მამა გიორგი დაკავება კი არ მოხდა, შეიძლება ითქვას რომ მოტაცება იყო. იმიტომ რომ, როდესაც მანქანაში ჩაჯდა და აპირებდა თვითმფრინავამდე მისვლას. ის 4-5 პიროვნება უკვე წინასწარ იქ იყო. ესენი იყვნენ პოლიციის თანამშრომლები, რომლებმაც გარკვეული ფიზიკური შეხებაც კი განახორციელეს მამა გიორგიზე.“- განაცხადა რამიშვილმა.

დეკანოზ მამალაძის უფლებადამცველის განცხადებით, მამა გიორგის პროკურატურაში მიყვანის შემდეგ განუცხადეს, რომ პატრიარქის მოწამვლის მცდელობისთვის იყო დაკავებული, როგორც მიხეილ რამიშვილი აცხადებს, ერთ-ერთი პირი ვინც მამა გიორგის აღნიშნული ინფორმაცია მიაწოდა მამუკა ვასაძე იყო:

„როდესაც მივიდა პროკურატურაში და გაეცნო როგორც მამუკა ვასაძე განუცხადეს, რომ იყო პატრიარქის მოწამვლის მცდელობისათვის.“- აღნიშნა ადვოკატმა.

მიხეილ რამიშვილი იმ ფაქტზეც ამახვილებს ყურადღებას, რომ მამა გიორგი მამალაძის დაკითხვის მცდელობას მანამდე ქონდა ადგილი, ვიდრე მისი ჩანთის შემოწმება მოხდებოდა. ამასთანავე ადვოკატი აქცენტს აკეთებს იმაზეც, რომ გაურკვეველია სად იყო დეკანოზის ჩანთა 9სთ 40 წთ-ის განმავლობაში.

„ყველაზე საინტერესო კი ის არის, რომ ბრალდებული არის დაკითხული წინასწარ, სანამ მოხდებოდა ჩანთის შემოწმება. ეს არის ნონსენსი, სანამ მტკიცებულება არ არსებობს, გარდა ერთი ინფორმაციისა, მანამ ჩანთას არ სინჯავენ. ჯერ დაკითხეს სადაც დუმილის უფლება გამოიყენა. 9სთ 40 წთ ჩანთა სად იყო დღემდე დაუდგენელია.“- განაცხადა მიხეილ რამიშვილმა.

შეგახსენებთ, საპატრიარქოს იურისტის ინფორმაციით, ამ საქმეში დაზარალებულად არა პატრიარქი , ან რომელიმე მაღალი იერარქიის სასულიერო პირი, არამედ საპატრიარქოს მდივან რეფერანტი შორენა თეთრუაშვილი ცნეს.