"საგამოძიებო ორგანოებს მცდელობა აქვთ, რომ ახალი ბრალი წამიყენონ "- გვარამია დაკითხვიდან გამოვიდა

სამართალი - 12:30, 16 Feb, 2017

5853

ნიკა გვარამია საქალაქო სასამართლოში გამოკითხვაზე იმყოფებოდა. რუსთავი2-ის გენერალური დირექტორის თქმით საგამოძიებო ორგანოებს მცდელობა აქვთ, რომ ახალი საქმე წამოიწყოს და მას ახალი ბრალი წაუყენონ. გვარამიას თქმით პროკურატურას ჩანაწერის შინაარსობრივი განხილვის გარდა არანაირი სხვა გამოძიება არ უწარმოებია, მათ შორის არც ამ ჩანაწერის უკანონო მოპოვებასთან დაკავშირებით. როგორც ნიკა გვარმია აცხადებს ამ ჩანაწერის შინაარსში არანაირი დანაშაულებრივი ქმედება არ იკვეთება. გვარამიას თქმით შესაძლებელია აღნიშნული ჩანაწერის ექსპერტიზა საზღვარგარეთ ჩატარდეს, რადგან საქართველოს ექსპერტიზის უწყებების მიმართ მას ნდობა დაკარგული აქვს:

„გამოძიება ცდილობდა შინაარსის გარკვევას, რა და რატომ ვისაუბრე. მათ ავიწყდებათ რომ ეს გამოძიება არ მიმდინაროებს ქრთამის აღების ან სხვა რაიმე ფაქტზე, არამედ ინფორმაციის უკანონოდ მოპოვებაზე. გამოძიება გამოწვლილვით ცდილობს ქრთამის საკითხის გამოკვლევას. ექსპერტიზა არის გაყალბებული. ისინი ცდილობდნენ, რომ მე უნდა გამემხილა წყარო ანუ მესამე პირი, მათი ეს კითხვა დარჩა უპასუხოდ“- განაცხადა ნიკა გვარამიამ.

გამოკითხვის დაწყებამდე გვარამიამ განაცხადა, რომ მისი და მამუკა ახვლედიანის საუბრის ჩანაწერი დიდი ხნის წინ არის წაშლილი, რადგან მისი შენახვის აუცილებლობა არ არსებობდა.

გვარამია ჩვენებას, კომპიუტერულ სისტემაში უნებართვო შეღწევის, მისი და მამუკა ახვლედიანის პირადი საუბრის ამსახველი ვიდეოჩანაწერის უკანონოდ მოპოვებისა და გავრცელების ფაქტზე აძლევდა.

ნიკა გვარამიას დაკითხვა სასამართლოში, მისი მოთხოვნის საფუძველზე მოხდა. რუსთავი 2-ის გენერალურმა დირექტორმა, რომელიც, შს სამინსიტროს კრიმინალურ პოლიციაში იყო დაკითხვაზე დაბარებული, უარი განაცხადა ჩვენება შსს-თვის მიეცა და სასამართლოში დაკითხვა მოითხოვა. იმავე დღეს შს სამინისტრომ სასამართლოს ნიკა გვარამიას დაკითხვის შუამდგომლობით მიმართა.