სააპელაციო სასამართლომ დღეს ძალაში დატოვა პირველი ინსტანციის გადაწყვეტილება მამუკა ახვლედიანის თანამდებობაზე აღდგენასთან დაკავშირებით. თბილისის საქალაქო სასამართლოს ყოფილი თავმჯდომარე აცხადებს, რომ მას არც უზენაესი სასამართლოს იმედი აქვს და ბრძოლას სტრასბურგის სასამართლოში გააგრძელებს. ამის შესახებ მამუკა ახვლედიანმა კურიერის პირდაპირ ეთერში ისაუბრა:

„დღევანდელი სასამართლო სისტემისგან არავითარი მოლოდინი არ მაქვს, ეს უბრალოდ ორჯერ ორი ოთხია. საწინააღმდეგო გადაწყვეტილების მიღების შემთხვევაში ყველა საბჭოს წევრი, ჩემი აზრით, უნდა მიცემულიყო პასუხისგებაში უფლებამოსილების გადამეტების გამო იმიტომ, რომ მათ საერთოდ არ ჰქონდათ ჩემი გათავისუფლების უფლება. მაგრამ აქ მთავარი არ არის, მამუკა ახვლედიანს აღადგენენ თუ არ აღადგენენ თანამდებობაზე. მე სურვილიც არ გამაჩნია მსგავს სასამართლო სისტემაში მუშაობის. აქ პრობლემა არის სწორედ იმ რეფორმებში და იმ საკითხებში, რაც დღეს ხდება სასამართლო სისტემის ირგვლივ. ამ თითქოსდა რეფორმების და პირველი, მეორე, მესამე ტალღების მეშვეობით,“ - განაცხადა მამუკა ახვლედიანმა.