გუშინ ბახმაროს გზაზე, ფოთელი, ექსტრემის მოყვარული ახლგაზრდების ჯგუფი დაიკარგა - ამის შესახებ "გურიის მოამბეს" ჩოხატაურის გამგებელმა ირაკლი კუჭავამ უთხრა.

მის მიერ მოწოდებული ინფორმაციით, 7-კაციანი ჯგუფი ბახმაროში ასვლას ცდილობდა, სადაც ძლიერი თოვისა და დაბალი ხილვადობის გამო გზა აებნათ. საჭირო გახდა სამაშველო ბრიგადების გამოძახება, რომლის დახმარებითაც, ახალგაზრდები ჩხაკაურამდე ჩამოიყვანეს და იქ სხვადასხვა ოჯახებში დააბინავეს.

გამგებლის თქმით, ისინი თავს კარგად გრძნობენ.

რაც შეეხება ზოგადად ჩოხატაურში არსებულ სიტუაციას, როგორც კუჭავა გვეუბენება, დიდთოვლობის გამო მუნიციპალიტეტის რამდენიმე სოფელში გზების გაწმენდა ვერ ხერხდება, პრობლემებია შუქის მიწოდების კუთხითაც, რადგან "ენერგო პრო ჯორჯიას" წარმომადგენლები ვერ გადაადგილდებიან იმ ადგილებში, სადაც დაზიანებულია სადენები:

"თითქმის ორ მეტრამდე აღწევს თოვლის საფარი დიდივანში, შუა სურებსა და ზემო სურებში. გზა ამ წუთებში იწმინდება ქვემო სურებში და ტექნიკა დაიძრება ზემო სურებისკენ. ძალიან მაღალია თოვლის საფარი ზოტშიც, სამ მეტრს მიაღწია. ადგილზე სამი ტრაქტორი გვყავს, მაგრამ ვერ ახერხებენ გაწმენდას, რადგან ისევ ინტენსიური თოვაა. ჩხაკაურაშია ასევე მობილიზებული ტექნიკა, მაგრამ იქ არსებობს ზვავსაშიშროებაც, ამიტომ სოფრთხილეა საჭირო.მძიმე გამავლობის ტექნიკა რომ ვამუშაოთ, ქობულეთიდან ველოდებით ლაფეტს. ამით გაიწმინდება როგორც ჩხაკაურას, ასევე ნაბეღლავის გზა.

სულ 14 ერთეული ტექნიკა მუშაობს ჩოხატაურში, მაგრამ მაინც არ არის საკმარისი. სოფლის შიდა გზების გაწმებდა ხვალ ნაშუადღევს უნდა დავიწყოთ, სოფლებამდე მისასვლელი გზები კი გაწმენდილია, ცენტრამდე სასწრაფო, ორხიდიანი მანქანები იმოძრავებენ.