ოლიმპიური კომიტეტის პრეზიდენტობის ყოფილი კანდიდატი სასამართლოში ჩივის

ოლიმპიური კომიტეტის პრეზიდენტობის ყოფილი კანდიდატი სასამართლოში ჩივის - რა პრეტენზიები აქვს ირაკლი მეძმარიაშვილს

სამართალი - 12:55, 26 Jan, 2017

1258

ოლიმპიური კომიტეტის პრეზიდენტობის ყოფილი კანდიდატი ირაკლი მეძმარიაშვილი აცხადებს, რომ არჩევნების დროს ხმის უფლების მქონე სუბიექტებს ჰქონდათ პრობლემები როგორც იურიდიული, ასევე რეგისტრაციის კუთხით.

ოლიმპიური კომიტეტის პრეზიდენტობის ყოფილი კანდიდატმა რამდენიმე დღის წინ საქალაქო სასამართლოს მიმართა.

რაც შეეხება გადაწყვეტილებას, მეძმარიაშვილის თქმით, საქალაქო სასამართლომ ოლიმპიური კომიტეტის არჩევნების შედეგები დროებით შეაჩერა, სანამ სასამართლო პროცესი არ დასრულდება.

მეძმარიშვილის განცხადებით, სარჩელი ეფუძნება საჯარო რეესტრის ამონაწერს და წერილს იმ ორგანიზაციების შესახებ, რომელთაც მისი თქმით, "არასწორი იურიდიული სტატუსი აქვთ და ზოგს საერთოდაც არ გააჩნია. ხმის უფლებით ვინც სარგებლობდა, გარკვეულ რაოდენობას ჰქონდა პრობლემები, როგორც იურიდიული, ასევე რეგისტრაციის თვალსაზრისით".

რაც შეეხება ოლიმპიური კომიტეტის არჩეული პრეზიდენტის პოზიციას. ლერი ხაბელოვი აცხადებს რომ მისთვის უცნობი იყო, რომ მის კონკურენტს არჩევნების შედეგები სასამართლოში ჰქონდა გასაჩივრებული.

როგორც "ნიუპოსტმა" გაარკვია, თბილისის საქალაქო სასამართლოს სამოქალაქო საქმეთა კოლეგიის წარმოებაშია ირაკლი მეძმარიაშვილის სარჩელი მოპასუხე საქართველოს ეროვნული ოლიმპიური კომიტეტის მიმართ.

"მხარეთა შორის დავის საგანს ა(ა)იპ საქართველოს ეროვნული ოლიმპიური კომიტეტის 2016 წლის 23 დეკემბრის საანგარიშო-საარჩევნო სესიის ოქმის და მისგან გამომდინარე შედეგების ბათილად ცნობა წარმოადგენს. ამავე სარჩელით, მოსარჩელემ დააყენა შუამდგომლობა უზრუნველყოფის ღონისძიების გამოყენების შესახებ.

2017 წლის 24 იანვარს, სასამართლომ დააკმაყოფილა წარმოდგენილი შუამდგომლობა და საქართველოს ეროვნული ოლიმპიური კომიტეტის 2016 წლის 23 დეკემბერს გამართული საანგარიშო-საარჩევნო სესიის მიერ არჩეულ პირებს აეკრძალათ ამავე სესიის ოქმით განსაზღვრული უფლებამოსილების განხორციელება და მოქმედებების შესრულება. ასევე, შეჩერდა ა(ა)იპ საქართველოს ეროვნული ოლიმპიური კომიტეტის 23.12.2016 წ. საანგარიშო-საარჩევნო სესიის ოქმით განსაზღვრული წესდებაში (სარეგისტრაციო მონაცემებში) რაიმე სახის ცვლილებების შეტანა და ამავე ოქმის მოქმედება სადავო საკითხზე სასამართლო გადაწყვეტილების მიღებამდე და მის კანონიერ ძალაში შესვლამდე.

ზოგიერთი მედიასაშუალებით გავრცელდა არასწორი ინფორმაცია, რომ საქმეზე მიღებულია საბოლოო გადაწყვეტილება. სასამართლო განმარტავს, რომ მიღებულია შუალედური გადაწყვეტილება- უზრუნველყოფის ღონისძიების გამოყენების დაკმაყოფილების შესახებ. სამოქალაქო საპროცესო კანონმდებლობის შესაბამისად, მოსარჩელეს შეუძლია მოითხოვოს უზრუნველყოფის ღონისძიების გამოყენება, რომელიც თავის მხრივ წარმოადგენს დროებით ღონისძიებას და მისი გამოყენება/არ გამოყენება გავლენას არ ახდენს დავის საბოლოო შედეგზე.

განჩინება უზრუნველყოფის ღონისძიების გამოყენების შესახებ ექვემდებარება დაუყოვნებლივ აღსრულებას. განჩინებაზე შეიძლება საჩივრის შეტანა მოპასუხეებისათვის მისი გადაცემის მომენტიდან 5 ხუთი დღის ვადაში თბილისის საქალაქო სასამართლოს სამოქალაქო საქმეთა კოლეგიაში"- ნათქვამია სასამართლოს გადაწყვეტილებაში.